Fit4Fun Arena في مجمع ديسكفري

11 Apr

وصلتنا دعوه من فريق فت فور فن لتجربه الارينا المتواجده في مجمع دسكفري

رحنا ناخذ فكره عن المكان

فت فور فن ارينا تعتبر اول حلبه داخليه بالكويت للعبه المسدسات بالكور الفسفوريه المشعه بالظلمه

الحلو بالموضوع ان ماكو اي تدمر او توصخ للملابس لان الكور المستخدمه بدون الوان

هذي المسدسات اللي تستخدم باللعبه

المسدسات المستخدمه عندهم تعمل بقوه الغاز (غاز ثاني اكسيد الكربون

ووزن المسدسات مو خفيفه بالنسبه لي و تعطي شعور انه سلاح صجي

هذا مدخلهم

وهذي خوذهم وستراتهم الواقيه

لما تدخل الحلبه تعطيك شعور فلم ترون لان مافي اضاءه بس الالوان الفسفوريه اللي بالطوف اهي الساطعه والوان الستره الواقيه والكور

 الجو داخل وايد يونس مع الاضاءه الفسفوريه

Sensor اشلون تنحسب النقاط ؟ عن طريق الستره الواقيه بس تطقها الكره فيها جهاز احساس

يحسب نقطه للفريق الضد وتطلع النتيجه اول باول عالشاشه

واللي يسجل النقاط الاكثر اهو الفايز

وبالخلفيه حاطين اصوات تناسب جو الاكشن داخل الحلبه

وفي العابهم يكون اللعب فريقين متضادين وكلما كثر العدد كلما كان الوضع ممتع اكثر

اكبر عدد ممكن يدخل الحلبه ١٦ شخص (٨ ضد ٨)

فت فور فن يناسب معظم الاعمار من ٤ سنين وطالع وحلو للعايلات والشباب

واللعبه وايد امنه لان موفرين الخوذ والسترات الواقيه

في عندهم ٣ العاب

Blast Ball

اللعبه الاولى:

بلاست بول اهي عباره عن كور مطاطيه فسفوريه حجمها كبر التيل تستخدم في المسدس

هذي اللعبه تناسب المراهقين والكبار لان الكره شويه يابسه وممكن اذا حاشت الريل او الايد تقرص الواحد  بس قرصه بسيطه مو ذاك العوار

😜  المفروض الشباب يتحملونها مو البنات

Bazooka Ball

اللعبه الثانيه:

بازوكا بول اهي عباره عن كره اسفنجيه حجمها وسط تستخدم في المسدس

هذي اللعبه تناسب الاطفال والمراهقين والكبار وحلوه للعوايل

وايد عجبتني هذي اللعبه وخاصه ان الكره اسفنجيه ماتعور يحس الواحد بالثقه لما يحوش احد فيها وما اخاف اذا حاشتني

Grenade Ball

اللعبه الثالثه

غرينيد بول اهي عباره عن كرات تنس تنحذف على بعض بدون اي سلاح

حلوه لليهال بس لقط كور وحذف وممكن الكبار اهلهم يشاركون باللعبه وخاصه ان الكل محمي بالخوذه والستره

Fit4Fun Arena

مكان ممتع للعايله والشباب والاطفال

حلو يطّلع فيه الواحد طاقته ويغير فيه الروتين

سعر اللعبه (بلاست وبازوكا بول) للشخص الواحد ٨ دنانير ومده اللعبه الوحده ١٥ دقيقه

سعر لعبه غرينيد بول للشخص الواحد ٦ دنانير

وفي عروض اذا الواحد يبي يمدد فتره اللعب وعروضهم وايد حلوه وفيها توفير

وعندهم باقات لاعياد الميلاد والاحتفالات

***عرض خاص لمتابعين مدونه كيفي***

١. فاوتشر خصم دينارين للشخص الواحد للعبه

 ٢. خصم ٥٠٪ من الاحد الى الخميس من ١٠ صباحا الى ١ ظهرا  قروب اكثر من ١٠ اشخاص بس لازم تحجزون قبل يوم او يومين

تلفونهم: 22913674

موقعهم عالنت

مكانهم في مجمع دسكفري الطابق الاول بجانب مكدونالدز

11 Responses to “Fit4Fun Arena في مجمع ديسكفري”

  1. Bnt Jaber BLog April 11, 2012 at 9:51 PM #

    مادري ليش تذكرت لعبة العمبر قبل لوووووووووول يعطيك العافية عالبوست ويبيله روحه والله الجو باين يونسسس 🙂

    • omrayan April 12, 2012 at 3:00 PM #

      اي لعبه الغرينيد بول اهي نفس لعبه العمبر 🙂
      حياج الله شرفتينا
      وجربي المكان راح تستانسين

  2. Rana ElMahmoud April 15, 2012 at 7:06 PM #

    Thank You Kaifii team ,,

    والله بيضتوووها … وبصراحة حابين نشوفكن ان شا الله في اكاديمية فت فور فن في حولي في مجمع بارشو ١٠ – برج الصفاة

    لعبة عمبر ………. صح مثل الجرينيد ووناسة كتييير

    لعبة البازوووكا … رائعة لكل افراد العائله بصراحة بيجوو كتييير بنات بس للعبة البازوكا وشي رائع التمتع بهذه اللعبة ان شاالله الكل يكتب لنا رآيه ويشاركنا في صفحتنا في الفايسبوك التي سآضع الان فيها هذا اللينك مشكووورين والله

    • omrayan April 16, 2012 at 12:12 AM #

      ولو ماسوينا شي كتبنا الصج
      الصراحه الارينا ممتعه وايد ويبيلها زياره ثانيه مع الاهل
      ويبيلنا نمركم الاكاديميه ونتعرف على نشاطاتها 😉

      • Rana ElMahmoud April 18, 2012 at 11:48 AM #

        السلام

        من يوم ٢١ ابريل ان شا الله الى يوم ٢٥ الجاري سنقدم لعبة رماية التارغيت في الطابق الارضي في مجمع ديسكفري مجاناااااااااااا لجميع الاعمار

        واتمنى حضوركم يوم الصحافة ايضا والتعرف اكثر عليكم سيكون يوم ٢٣ ابريل الساعة السادسة ان شا الله

        اما يوم ٢٦ ابريل فهو يوم تحدي العائله في اكاديمية فت فور فن في حولي نتمنى حضوركم قبل او خلال هذا التحدي والتمتع معنا بكم من المفاجأت الرياضية والترفيهية

        بتشرفوو وقت ما بتحبوو ان شا الله

      • omrayan April 18, 2012 at 7:59 PM #

        ان شاء الله لازم مانطوف هالحدث

Trackbacks/Pingbacks

  1. معارض وفعاليات « kaifiiblog - July 15, 2012

    […] Fit4Fun Arena في مجمع ديسكفري […]

  2. معارض وفعاليات | kaifiiblog - April 16, 2013

    […] Fit4Fun Arena في مجمع ديسكفري […]

  3. ديسكفري الكويت - مجمع ديسكفري للأطفال - أفضل المحلات والمطاعم في ديسكفري الكويت - January 13, 2018

    […] اليوم مثل غرفة الفلين ومتاهات الأطفال والزحاليق، لعبة بلاست بول وبازوكا بول ثمنها للفرد 8 دنانير ، لعبة غرينيد بول […]

  4. ديسكفري الكويت – مجمع ديسكفري للأطفال – الاولى پريس - January 13, 2018

    […] اليوم مثل غرفة الفلين ومتاهات الأطفال والزحاليق، لعبة بلاست بول وبازوكا بول ثمنها للفرد 8 دنانير ، لعبة غرينيد بول […]

  5. بالصور .. احصل علي متعة التسوق والترفيه في ديسكفري الكويت – سفاري نت - January 13, 2018

    […] مثل غرفة الفلين ومتاهات الأطفال والزحاليق، لعبة بلاست بول وبازوكا بول ثمنها للفرد 8 دنانير ، لعبة غرينيد بول […]

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: