في تجربتنا للاقامة في فندق الشانغريلا مسقط
حجزنا رحلة الدلافين متوفره في فندق البندر
متوفره الصبح على فترتين
٨:٣٠ والثانية ١٠:٣٠ صباحا
والقارب كبير يكفي ١٨ شخص
حجزنا الرحلة بالتلفون كلمنا فندق البندر وسهالات ارسلوا لنا سياره لفندقنا الواحة
وعلى طول ودتنا المارينا اللي يتواجد فيه قارب الرحلة
البحر نظيييف ويشوووق
انطلقنا بسرعة متوسطة مع ان رطوبة
لكن مع سرعه القارب الهوا صار بارد ومنعش
سائق القارب اسمة يوسف
محترم جدا وخدوم وكان القارب على حظنا فاضي محد معانا
فأخذنا راحتنا بالتنقل بين الكراسي
وموفرين لنا ثلاجة فيها ماي وعصير ومشروبات غازية مجانا
اليهال راح يحبون الرحلة وايد
ومدة الرحلة ساعتين
دخلنا داخل البحر حوالي نص ساعة لان الدلافين داخل خليج عمان وبعاد
ويوقعونكم على ورقه ان ممكن ماتلاقون اي دلافين او ممكن ماتشوفون ولا دلفين على حظكم
ولقينا قطيييع من الدلافين السود
شكلهم عجيييب حوالي ٣٠ دلفين مع بعض
ومع الدلافين حوالي ٥ قوارب صيد سمك صغيره تلحقهم كل مكان
طلعوا انهم صيادين سمك التونا وان التونا تكون مع قطيع الدلافين
وهذي بعض اللقطات للدلافين في خليج عمان
وبعد تقريبا ساعة من ملاحقة الدلافين وتصويرها
رجعنا للفندق عن طريق المرور بهذا التجويف الجميل
وهذا فندق الحصن التابع للشانغريلا مواجهه للبحر
وهذا البيت الازرق من زجاج لصاحب فندق شانغريلا
الله يبارك له خوش موقع
رحلة الدلافين تكلف حوالي ١٤ دينار للشخص
و١١ دينار كويتي للاطفال
والحجز من فندق البندر قسم الرحلات
كانت رحلة ممتعه وحلوه واستمتعنا بالهوا الحلو والدلافين
تقريري عن فندق الشانغريلا مسقط
جزاج الله ألف خير على الشرح الواضح وعلى الصّور
العفو ويسعدني اني افدتكم
ما شاء الله انا رحت العصر طبعا ماكو دلافين بس استاتسنا الكابتن عطانا جوله حلوة شفنا المناظر الروعه و القلاع كانت رحله تهبل
عليكم بالعافيه
صج مكان روعه ولازم نرد له مره ثانيه
مشكوره عالتقرير ماقصرتي نفعني