Kaifii

مطعم ذا غروڤ موجود في المباركية
شكل المطعم من الداخل مثل الغابة مع اصوات العصافير
قعدته حلوه غير عن الديكورات اللي متعودين عليها
واكثر شي سمعت عنه طبق الكندر بانكيك ان مميز عندهم
مريته عالغدا وجربت جم طبق
كميات الاكل راهيه

السيزر سالاد كانت حلوه

ربيان الغواكمولي كان ماصخ والربيان زفر

برغر ذا غروڤ الصمونه لينه وترفه لكن لحمه البرغر كانت عاديه
بس حجمها راهي كبير وكان فيها مربى كرز احسه خرب الطعم

واخيرا الكندر بانكيك اللي سمعت عنه
الشكل عجيييب
لكن الطعم عادي جدا مثل اللي احضره بالبيت مافي شي مميز

المطعم بشكل عام جوه حلو والاكل عادي والاسعار مبالغ فيها بعض الشي

للي حاب يزوره المطعم موجود في المباركية مقابل سوق الكويت للاوراق المالية

صاحب مطعم شوكليت كوزين ارسل لنا دعوة
لتجربه اطباق مطعمه الجديد في مجمع اي مول بحولي

المطعم متخصص بالكاكاو ولكن فيه اطباق رئيسية مثل السلطات والباستا والسندويشات

زرناه حزه الغدا وكان هذا اختيارنا

شوربة كريمة الدجاج

تقديم الشوربة داخل الخبزه وايد حلو ويشوق
العاده الخبزه تكون يابسه وماتنوكل
لكن خبزتهم عجييبه حبيتها لدرجه اني كليتها بعد ماشربت الشوربه

شوربة كريمة الدجاج كانت حلوة
لكن شوربه المشروم كانت جدا مااالحه

سيزر سالاد هي سلطتنا المفضله ونطلبها بكل مطعم
كانت حلوة عندهم الخس فريش وصلصه السيزر مضبوطه وحامضه شوي مثل اللي احبها والثوم فيها خفيف جدا او مافيها وهذا شي حلو بعد

باستا الفريدو
الباستا وايد حلوة والصلصه دسمه لذيذة

خليينا مكان للحلو بما ان المطعم تخصصه الكاكاو

وافل ستيك
الوافل كان لين وايد مو كرنشي كان مثل الكيك اسفنجي شخصيا احب الوافل يكون كرنشي شوي
وصلصه الكاكاو البيضه والسوده خربوا على طعم الكاكاو بالحليب كان طعمهم مو مضبوط
انصح اللي بيطلبه ياخذه بصلصه كاكاو بالحليب فقط

برغر الكاكاو
كانت جيدة

قطعه الكاكاو بارده وكبيره والبريوشه كانت احلى شي بالطبق

بيتزا الفاكهه وبيتزا المكسرات بالمارشملو
اهي نوعين بيتزا بس طلبناها نص بنص عشان نجرب النوعين
عليها نوتيلا ومذوبين المارشملو يمط منها وعليها فاكهه و بندق
البيتزا حلوة للي يحب النوتيلا

وطلع سعر الطلب معقول بفاتورتنا عالاطباق اللي طلبناها

السيرفس يبيله تدريب اكثر طلبنا طبقين وماوصلوا لنا وردينا طلبناهم ممكن نعذرهم لان مطعم جديد

حبيت بالمطعم الاطباق الرئيسيه المالحة اكثر من اطباق الكاكاو
مكانهم حلو بالمجمع عالشارع وفي قعدة داخليه وخارجيه

اللي موجود بحولي ممكن يمرهم لعشا خفيف او سناك سريع
مكانهم في مجمع اي مول مجابل مركز سلطان حولي والمهلب

@chocolatecuisine