Sunny Side Up اطباق الشيف جميلة اللنقاوي في مطعم صني سايد اب

 

وصلتني دعوة لتجربة الاطباق الجديدة في مطعم صني سايد اب

واللي فاجئني وفرحني بنفس الوقت لما عرفت ان الاطباق على ايد الشيف المبدعة

جميلة اللنقاوي

شخصية مشهورة طافوا متابعينها المليون بالانستغرام

انا والوالدة من متابعينها ونحب وصفاتها ودايما لما نطبقهم يطلعون مضبوطين

ما شاء الله عليها متواضعه وحبوبة استانست لما شفتها وسولفت معاها

جربنا بعض من اطباقها في المنيو

ونزلوا لنا وايد اطباق لتذوقها

الايس تي بالخوخ كان يسررسح ولذييذ

والباشن فروت خفيف

هذا طبقهم للضيافة كبة عربانة بالمرقة

كانت الكبة لذييييذه خاصة المرقة حاامضة حبيتها وايد

سلطة الهوني ماسترد من منيوهم القديم ردوها

عاد سلطتي المفضلة في مطعم صني سايد اب من سنييين

سلطة الدياي المشوي

ماجربتها لاني جابلت الهوني ماسترد 🙂

بطاطهم المقلي وصلنا حااار ومقرمش مع كتشب وجبن سايح على جنب

القبوط عجبني شكله وطعمه بنفس الوقت

الشيف جميلة سوت القبوط على شكل الرافيولي فكانت الحبات خفاف مو عجينه واللحم المفتت الذايب عالويهه طعمه لذييذ والمرقه على جنب

عمري ماشفت القبوط مرتب جذي بالصحن 🙂

مشوي جدر دياي

حلو تقديمهم اييبونه بالجدر مقلوب ويشيلون الجدر جدامكم ويزينونه بالبصل اللي جنه حلقات بصل

العيش بسمتي حبه طويله وطعم مشوي الجدر بالنسبه لي مقارب للبرياني بس بهاراته اقل

حبيته وايد

ربيان بالكاري ماجربته بس امدحوه اللي معاي

ميني برغر حق اللي مايبي العيوش

لزانيا شكلها يشوق بس هم ماجربتها

باستا الذهب

صلصتها بالزعفران

باستا اللحم

باستا الفريدو من منيوهم القديم لذيذه كالعادة

حبيت اطباق الشيف جميلة بالمطعم وبانتظار باقي اطباقها وابداعاتها

الحلو بمطعم صني سايد اب ان مكوناتهم كلها محلية وفريش

 اللحم عربي والدياي المتحدة والهامور والربيان كويتي

واضح من طعم الاكل ان مكوناتهم فريش شخصيا حبيت العيوش الاطباق الكويتية اكثر من الباستا

لان اللي متابعني يعرفني مو من ربع الباستا وماكتب وايد عنها

بس اللي تعشوا معاي مدحوا بالباستا وايد

ناقصهم حاليا الحلو والاطباق يايه قريب ان شاء الله

الصراحة تقديم حلو وطعم ألذ وقعدة راقية بمجمع هادي

المطعم في برج التجارية في شرق بالطابق الارضي

2246 3431

@sunnysideupkw

كل الشكر عالدعوة والضيافة وفرصة حلوة اني قابلت الشيف جميلة