ثاني زياره لي لمطعم مونسون في منطقه العدلية في البحرين
المطعم اسيوي وايد راقي
والخدمة ممتازه يمكن لان كان فاضي فكانوا مجابلينا
طلبنا اطباق متنوعه تايلندية وصينيه ويابانيه
كان طبق المقبلات تايلندي وفيه تشكيله متنوعه
وشوربه التوم يام عطرية ولذيذة
وسلطه اللحم التايلنديه كان اللحم ترف ولذيذ
وطبق الكاتسو الياباني كان راهي وكبير
الصراحه خوش مطعم وايد لذيذ لكن اسعاره غاليه
اضغط عالصور لمشاهدة اوضح
فندق وستن البحرين
كان اختيارنا في السفرة الاخيرة للبحرين
اول شي لان سعره جدا مناسب وثاني شي عشان موقعه المميز في مجمع سيتي سنتر البحرين
حجزنا غرفتين ديلوكس كونكتيد اللي يكونون متصلين بباب بينهم
وطريقه حجز هذا النوع من الغرف لازم عن طريق الاتصال عالفندق
او ممكن تكتب ملاحظة على موقع الحجز انك تبي غرفتين متصلين بباب
الغرفة حجمها وايد راهي وكبير والمنظر المطل عالشارع الرئيسي وايد شرح
نظافة وراحة استمتعنا الصراحة
الحمام طوفته زجاجيه ممكن تخليها شفافه او تعتمها هم يعطي حجم اكبر واشرح للغرفه
مدخل مباشر من داخل الفندق عالمول
والخدمة كانت ممتازة
شفت بالانستغرام في حساب انسايدر الامريكي
ريفيو عن كافيه ماما موجا بالبحرين
عن كوب الوافل بالكورن فليكس بالكاكاو
وقررنا نزوره
جربنا طبقهم المشهور وكانت لذيذ فيه الوافل الفريش الحار مع الكورن فليكس
ونوعيه الكاكاو المستخدمه لذيذه
لكن هل يستحق اعيد الزياره له؟
لا ما اعيدها لان نفس الطعم مكرر في كافيهات الكاكاو
ونفس طعم ديب ان ديب بالضبط
الكافيه مكانه في منطقه الهملة
مطعم غولد ليبل برغرز بالبحرين
شدتني الصور بحسابهم الانستغرام وقلت لازم نروح نجربه
المطعم بسيط مثل مستوى مطاعم الفاست فوود
طلبنا الشكن برغر وصلتنا غير عن شكل الدياي اللي حاطينه بانستغرامهم
الديايه وايد اصغر واضعف من صورهم وكانت عاديه
اومامي برغر
كانت عجيييبه شي لذيييذ البن ترررف والبرغر جووسيه
مع حلاوة البصل المكرمل والمشروم
كانت جدا لذيذه
عندهم فرعين وزرنا فرع منطقه سار
مطعم رايس بول في البحرين
جربنا فرع مجمع السيف المكان شرح وايد ومرتب
المنيو فيه كل شي اكل بحريني واكل صيني واكل هندي
ومنيو الريوق شكله وايد حلو بس للاسف ما مدانا نعيد الزياره عشان نجربه
جربنا مرقه الهامور البحرينية كانت وايد لذيذه
مع المقبلات الشرقيه والتندوري الهندي
المنيو كبير وفيه خيارات متنوعه يستحق تكرار الزيارة
اضغط عالصور لوضوح اكبر
مطعم شي شعبي في البحرين
من المطاعم المميزه اللي جربناها في زيارتنا السابقه للبحرين
الديكور حلو وشعبي والاطباق والمنيو بحريني وفيه اطباق لبنانيه
كانت الخدمة بطيئة ووصلت الاطباق بعد فتره طويله
لكن كان اللي وصل كان لذيذ يستاهل النطره
المقبلات الشرقيه وخاصه الفتوش لذيذ
والتكا البحرينيه والتكا الايرانية بس البحرينية كانت الذ
والربيان المشوي حجمه كبير وراااهي والطعم ممتاز
واخر شي لامب شانك سبيشال موزه اللحم مع العيش شي خيااال وترررف لازم تطلبونه
اضغط عالصور لمشاهدة اكبر واوضح
كانت زياره لذيذه للمطعم والاطباق قويه
اذا زرت البحرين مره ثانيه لازم امرهم
مكانهم في شارع البديع
اللي يزور البحرين لازم يتريق في باب البحرين بالمنامة
المكان وااايد شرح وحلو الصبح النور يدخل بالمجمع من كل مكان
وفيه مطاعم تقدم الريوق الشعبي البحريني
السنه اللي فاتت جربنا الريوق في كافيه نصيف بنفس المجمع
Naseef كافيه نصيف للريوق في مجمع باب البحرين
وهالمره قلنا نغير وجربناه في مطعم زعفران
القعده حلوه ومريحه وطلبنا ريوق زعفران
وصلتنا هذي الصينيه اللي بالصوره
فيها البلاليط والفاصوليا والشكشوكه والروب العسل والفول
مع صمون زنجباري بالجبن وصاج المهياوه وصمون الكباب بالمتاي
طلبنا بعد غوري كرك
الصراحة شي لذيذ والاجواء حلوة
اضغط عالصوره لمشاهدة اكبر واوضح
وقت الفاتوره اييبون لك شوت زعفران
الصراحه طعمه عطر كان مو شي
الظاهر مكثرين ماي الزهر فيه
مطعم زعفران في باب البحرين
الصراحة المرتهشة في سوق باب البحرين شي جميييل
وياخذ القلب منظرها خيااالي
لازم اللي يروح يصورها ويصور معاها من جمالها
وهذي نبذة عنها للي حاب يعرف اكثر
المقاله من وكالة الانباء البحرينيه
لمنامة في 4 مارس / بنا / ضمن فعاليات مهرجان ربيع الثقافة 2017، دشن مساء اليوم السبت النموذج التركيبي لقطعة “المرتهشة” بدعم من مجموعة جي إف إتش المالية وذلك في منطقة باب البحرين في العاصمة المنامة، نظراً لارتباط المنطقة بتاريخ صناعة وتجارة الذهب في البحرين.
وبهذه المناسبة صرحت معالي الشيخة ميّ بنت محمد آل خليفة رئيسة هيئة البحرين للثقافة والآثار بأن نموذج المرتهشة الذي يستقبل زوّار المنامة من باب البحرين، سوف يضيف إلى جمال وعراقة المكان رونقاً تراثياً يجسد شعار هيئة الثقافة لهذا العام “آثارنا إن حكت”. وأضافت معاليها: منطقة باب البحرين التي تخبر عن تاريخ المملكة عبر المبنى الذي يضم مكتب المغفور له بإذن الله تعالى الشيخ سلمان بن حمد آل خليفة حاكم البحرين، ومركز المعلومات بالإضافة لدائرة البريد والمقاهي التراثية والهند الصغيرة، تجذب اليوم السائح والزائر بصورة مختلفة إذ تجسد المرتهشة عراقة صناعة الحلي والذهب والتي اشتهرت بها المنامة منذ عقود”.
مطعم هاش هاوس التايلندي في العدلية بالبحرين
المطعم هذا شكله من بره مو مكتوب عليه اسم المطعم
في شارع العدليه المشهور بالمطاعم
المكان بسيط وحلو
Lemongrass Juice
عصير الليمون غراس
كان لذيذ ومنعش وتقديمه جدا مميز
والجبل اللي بالنص هذا ثلج مجروش
ليمون بالنعناع كان حده مضبوط ولذيذ
Tom Yum
توم يام خضار هم لذيذه
Papaya Salad
سلطه البابايا سبايسي لذيذه
Chicken satay
اسياخ الدياي الساتاي بصلصه الفول السوداني كان جيد
Fried Rice
العيش المقلي بالبيض والربيان كان تقديمه حلو
بس مشكلته بالربيان كان بذيله يعني وانت تاكل العيش تعال قشر الربيان العاده بالفرايد رايس يكون الربيان مقشر وجاهز للاكل
Shrimp Tempura
ربيان مقلي كان زفر شوي
تجربه تايلنديه لذيذه في هاش هاوس
والاسعار كانت مناسبه ارخص من المطاعم التايلنديه بالكويت بوايد
هاش هاوس بالعدلية بالبحرين
البحرين مشهوره بالمشويات وخاصه التكا البحرينيه
شي لذيذ واعرف ناس يروحون البحرين ياكلونها ويردون
المميز بتكتهم نكهتها باللومي الاسود لذيييذه وهم التكا نفسها ترررفه وجوسيه
طبعا لازم تاكلها حارا بحزتها
ودايما ناخذ من تكا بوشنب في المحرق المكان بسيط لكن التكا عنده خطيييره
وهذا فيديو داخل المطعم صورته لعيونكم
زرنا البحرين قبل اسبوع وسكننا في فندق
فريزر سويتس السيف
هذا الفندق يعتبر شقق فندقية وجربته في لندن وحبيناه
Fraser suites London تجربتي لفندق فريزر سويتس لندن
حجزت الفندق من موقعهم الرسمي طلع ارخص من كل مواقع الفنادق من بوكيننغ واغودا وغيره
المميز فيه انه في مجمع السيف والدخول للمجمع عن طريق اللوبي
ننزل المجمع في اي وقت للريوق او الغدا او السينما او للتسوق
والمجمع حلو فيه كل شي للاطفال والكبار
اضغط عالصور لوضوح اكبر
الصراحة تجربه ممتازه الفندق مريح ونظيف والخدمة خمس نجوم
وموقعه ممتااااز بمجمع السيف وبجانبه مجمع العالي تروح له مشي
اذا حصل لي اكرر السكن فيه بالمستقبل
bahrain.frasershospitality.com
في البحرين امدحوا لنا مطعم برغر محلي اسمه بليز
في منطقه العدلية
المنطقه دواعيس بس معروفه بمطاعمها
هذا شكل المطعم من الداخل
نفس نظام المطاعم السريعه
تطلب عالكاشير وتدفع اول وعقب تدور لك طاوله
خذنا الكريزي فرايز
مع جبن وبيكون وصلصه كان جيد
بطاط سكوبيرز وااايد لذيذ وكرنشي حبيناه
وهذي صمونتهم المشهوره اسمها
طابوقة
اتيي ٤ توستات داخلهم جبن ساااايح وقطعتين برغر مع الخس والطماط والصلصه
التوست لذيذ تخيل غريل شيز ساندويش وداخلها بعد برغر
كانت حلوه ومتروسه جبن بس الصلصه كانت طاغيه حلاته لو طالبينها بدون صلصه وكانت دسمه وايد
بشكل عام حلوه للتجربه
وفي طابوقه ثانيه ايي معاها الجبن ومعاه معكرونه بس ماجربتها
وعندهم البرغر الواغيو مع البن الكلاسيك
اخترنا مع صلصه الباربيكيو الحاره هم كانت لذيذه
كانت تجربه حلوة في بليز برغر
مو الذ برغر ذقناه لكن كان ممتاز وممكن الواحد يجربه
حبينا نتريق بره وخبراء البحرين قالولنا عن مجمع باب البحرين
داخله في ٣ قهاوي تقدم الريوق بطريقه شعبية اتيي لكم صينيه وفيها انواع مختلفه
الصراحة قعدنا بمطعم واحد فيهم بدون اي اختيار مقصود
وجربنا كافيه نصيف
المجمع مثل ماتشوفون بالصوره وااايد شرح وتدخل له الشمس من كل مكان وطبعا مكيف
زرناه في ايام الاسبوع والحمدلله كانت نص الطاولات فاضية
لان قالولنا بالويكند يكون في انتظااااار عالكافيهات بالساعات
اخذنا صينيه ريوق حق شخصين ب ٦ دنانير بحريني
التقديم يشوق مال أول
حمسة بطاط كانت لذيذه
شكشوكه او بيض طماط هم كان وااايد حلو
حمسه نخي عجييب
هذا اتوقع باجيلا مطحونه او يمكن فول بس ماحبيه كلش الطبق الوحيد اللي ماعجبني
البلاليط كان لذيييذ مافيه دهن والبيض مسوينه ضعاااف جنه رقاق خفيف ولذيييذ الطبق
الفلافل كان مقرمش وكرنشي
خبز المهياوة كان تررررف ولين وحااار ولذييييذ وااايد حبيته
اهو الطبق الفايز بينهم 🙂
تجربه ريوق لذيييذه والصراحه الكميه تكفي ٣ اشخاص مو شخصين
كانت الكمية راهيه وتشبع
وقوري الكرك يكفي ٤ اكواب بدينار
الصراحه الاسعار وااايد ممتازه
عجيب الكرك مضبوووط
هذا مجمع باب البحرين من الداخل
واهني باب البحرين بره الطريج اللي يودينا لداخل المجمع
يذكرني بالمباركية بس على اكشخ
موجود مجمع باب البحرين في سوق المنامه القديم
اللي يزور البحرين لازم يروح يتريق عندهم
في زيارتي الاخيرة للبحرين
اخترنا فندق روتانا ماجستيك ارجان
المميز فيه ان قريب من المطار وانه شقق فندقية تناسب العوايل
في منطقة المحرق وبالذات في البسيتين
اخذنا سويت فيه غرفتين نوم ل٤ اشخاص
عندهم نظامين للسويت واحد دوبلكس تصير الصاله تحت وتركبون الطابق اللي فوق لغرف النوم
وفي السويت اللي يكون كله طابق واحد للناس الكبار اللي مايقدرون يركبون الدرج
السويت ماشالله راهي وكبير قعده راهيه وطاوله طعام ل ٦ اشخاص
والمطبخ بعد كبير وفيه كله شي من فرن وجوله وغساله صحون
مع ان خدمة الغرف ينظفون المواعين كل يوم نخليهم بالمغسلة
ومتوفره بعد غساله ملابس واوتي الهدوم
وهذا شكل الدرج لغرف النوم فوق
السرير مريييح وناااعم والمنظر شرح خاصه ان الدرايش كبااار على كبر الطوفه
السويت فيه ٣ حمامات
واحد في الصاله والثاني في غرفه النوم مع دش والثالث بالغرفه الثانيه مع بانيو
الغرفه الثانيه ممكن تختارون سرير كبير كنغ او سريرين توين
هذا الحمام مع البانيو
المنظر من البلكونه على مستشفى الملك حمد الجامعي
وحمام السباحه مفتوح يوميا لي ال٩ بالليل
وعندهم جيم للرياضة ومنطقه العاب للاطفال دوارف
الصراحة الفندق وايد حلو واسعاره معقوله على الخدمة المتوفره
كانت تجربه ممتعه ومريحه بهالفندق واكيد راح نقعد فيه مره ثانيه اذا احتجنا سويت
