حديقة ذا برنس
مثل ماتشوفون بالصور فيها طاولات كبيره لقروبات اشخاص كبيره وداخلها حديقة كبيره
العادة اييون لها مجموعات كبيره وتحجز لها طاوله كامله
فيها ٤ مطاعم اكل سريعه
منهم مطعم باتي اند بن للبرغر الشهير في لندن
ومطعم كوك فايتر للدجاج المقلي وايد لذيذ صمون الدياي المقلي
وفي مطعم اسيوي طلبنه منه كلاماري كان عادي وثاني اسباني
اذا حابين تاكلون فيه يفضل تروحون الظهر قبل المغرب وقبل الزحمه تاكلون على راحتكم وتمشون
ما انصح فيه بعد فتره المغرب او بعطل نهاية الاسبوع
مطعم ايتس من المطاعم القديمه اللي زرناها من قبل
والى الان محافظة على مستواها
المطعم يقدم برغر وباستا ومقبلات متنوعه من اكثر من مطبخ
بدينا بالسلطه الفيتناميه لذيذه وفريش
وبعدها دخلنا بالمقبلات مع الربيان الحار اللذيذ والبطاط بالجبن السايح والصلصه الحاره
والماك اند شيز مع الشيتوس
وبوب كورن الدجاج الكوري
والذره المشويه مع الجبن عالطريقه الفرنسية
وعقب دخلنا عالاطباق الرئيسيه مثل البينك باستا والبرغر السودة بلاك ماجيك بالفقع الترفه الجوسيه
وماننسى صمونه الدجاج المقرمشة بصلصه الهوني ماسترد
كان الصراحه غدا لذيذ وناطع
اخر شي قدموا لنا من قهوتهم المتخصصه أي ام باريستا
سبانش لاتيه بالقهوة العربية كانت كلها هيل وزعفران
و روز سبانش لاتيه المثلج هذا بالذات حبيته وايد
ولاتيه الفليك الحار
زياره لذيذه والمكان هادي ومرتب
مطعم ايتس في شرق بالديره بجانب مجمع كيبكو
كافيه ليلو من الكافيهات المشهوره بالبحرين ودايما المكان زحمه
جربنا الريوق عندهم في زيارتنا السابقه للبحرين
منيو الريوق عندهم وايد كبير تضيع فيه ماتعرف شنو تختار منه
التقديم عندهم وايد حلو والطعم جدا لذيذ لكن الاسعار غاليه
شكشوكة مع اللبنه شي لذيذ البهارات معتدله واللبنه غنيه والصمون الصغار معاه ترفيييين
والبيض التركي بيضتين بوتشد مع لبنه بالشبنت هم كان شي لذيذ
والتوست محشي بالجبن وعليه مسحه افوكادو باللبنه وعليها البيض البوتشد
كل طبق الذ من الثاني
واخر شي فرنش توشت بالفراوله ترف ترف ترف
الصراحه يسوى الريوق فيه الطعم ولا اروع
كافيه ليلو فرع العالي
هالبوست ما حطيته من فتره او بالاحرى نسيت انزله بالموقع
لكن كانت تجربه جميله ولازم انزلها بالموقع لان جربت اطباق لذيذه من بوثات مختلفه
واكيد موجوده في دبي او راح ترد تشارك بمعارض ثانيه
اتصالات بيتش كانين كان مشارك في مهرجان دبي للاكل في شهر فبراير ٢٠١٨ اللي فات
جربت الوافل بالدجاج المقلي كان وايد لذيذ مع عده صلصات من اختياركم
وجربنا بعد الدونت الميني كان هش وخفيف
والبرغر بعد كانت لذيذه
لكن الباو للاسف الطبق الوحيد اللي ماعجبنا
المعرض كان حلو ومميز عالشاطئ وكان الجو وايد حلو في فبراير في دبي
سنين وانا ازور دبي ودايما اشوف فندق غراند حياة ولا مره فكرت اني اجربه
سكنت فيه في زيارتي لدبي الاسبوع اللي فات
وفاق الفندق كل توقعاتي
اللوبي كبييير وشرح وفيه شلال ماي وحديقه داخليه
اخترت الغرفه العادية وكان حجمها وايد كبير وشرحه فيها مكان كبت الملابس منفصل
والحمام كبير ومقسم لدوش ومرحاض والمغاسل
والفراش وااايد مريح
وطوفه الغرفه كلها من زجاج شررحه مطله على برج خليفه وناطحات السحاب
ولازق بالفندق سينما والوافي مول
وجربت خدمة الغرف مرتين كان اكلهم ممتاز
وبوفيه الريوق مايتطوف كل شي يخطر على بالك ماتخلص منه من كثر الخيارات
الصراحة انصح فيه وسعره مقارنه بفنادق دبي يعتبر ممتاز
اصغط عالصور لمشاهدة اوضح
مطعم بيغ شيف اهو تركي الاصل
ويقدم الاطباق العالميه والتركيه
مشهور في تركيا وعنده فروع كثيره بتركيا
وفي له فروع بدبي والسعوديه وبالكويت
اول مره اجرب المطعم
ديكوراته وايد حلوه والمنيو كبير
سلطه جبن الماعز مع صلصه التوت
كانت حلوه
بيتزا مرغريتا للاطفال
هذا دجاج شنتزيل للاطفال
لكن كان الطعم مو ذاك الزود حتى اليهال ما قدروا ياكلونه
دجاج مفروم مسوينه اقراص وعليه بقصمات
برغر الدجاج كانت ناشف ويابس
غير موفق
كباب بالروب مكتوب بالمنيو
لكن اللي وصل شرايح لحم بالروب
كان الطبق جيد
كنافه بالبلوبيري
كانت وايد حلوه
افضل طبق
الصراحة كانت تجربه جدا عادية يمكن ما عرفنا نختار الاطباق الصح
بيغ شيف في الجي بي ار دبي
مطعم اورا من المطاعم الجديده بالكويت
فاتحين في محمع الغوالي بالديره
المحل فيه جم طاوله داخل وعدد الطاولات بره اكثر
خاصة الجو الحين صار لندني اكيد بتختارون القعده الخارجية
المطعم يقدم الاطباق الامريكية والاسيويه
من مقبلات وسلطات وبرغر وباستا وبيتزا ودياي الاناناس غير منيو الحلو
وهذي صور الاطباق اللي جربناها عندهم
مشروب الضيافة يقدمونه لك على حسب مودك
وانا كنت سعيدة وقدمولي مشروب السعادة الاصفر
سلطة الجرجير بالفيتا والبلسميك شي لذيذ بدينا فيه وجبتنا
شوربة المشروم والتقديم وايد حلو
الربيان بصلصه السويت سبايسي لذيذ وحالي
بطاط بالجبن
البرغر السودة مادري شسمها
بس كانت قوييييه ولذييذه حبيتها وايد مع البصل المكرمل والجبن السايح
الكولا ريبز شي خيااالي وترف وذااايب ذوووب
الدياي بالاناناس مع العيش وايد حلو
ختمناها بالبرواني بالايس كريم
الصراحة تجربه مميزه لاطباق لذيذه وخدمة روعة
مطعم اورا في مجمع غوالي الدور الارضي
يفتح يوميا للريوق والغدا والعشا
من ٧ الصبح لي ١٠ بالليل ايام الاسبوع وبالويكند لي ال١٢ بالليل
22320566
فيديو الزيارة
مطعم فيش اند كو
مطعم اكل بحري فرانشايز من سنغافوره
بدعوة كريمة من المطعم زرناه وجربنا اطباقه
طلبنا المقلي والمشوي وبالفرن
المقالي عندهم لذيذه خاصه ان طبقه البقصمات او التمبورا مقرمشة
والمشوي لذيذ بصلصاتهم المختلفه من الكيجن والزبده بالليمون والثوم بالاعشاب
وجربنا الفيش اند شبس شي خيالي ومقرمش ولذيذ
المحار والسكالوب والكلاماري ممتازين عندهم
الربيان والسمج كانوا من الذ الاصناف عندهم
الاكل مافيه زفره وكميه الاطباق ممتازه والقعدة راقيه والخدمة سريعة
المطعم حجمه كبير وراهي والقعده مريحه في الصوفا القنفات وفي طاولات عاديه بكراسي مريحه
عندهم سلطات ومقبلات وشوربات وبيتزا وباستا بحريه وغيرها
فيش اند كو في السالمية في مجمع دلال الدور الاول
22209212
New superfood salad pizza express recipe
طريقه سلطه سوبر فوود من مطعم بيتزا اكسبرس
من السلطات اللذيذه والمفيده
حبيت اقول لكم طريقتها وايد سهله
المكونات
خس وجرجير و اي نوع خضار ورقيه تحبونها
خيار مقطع
بصل احمر مقطع
نخي
كينوا حمرا او ملونه
رمان (مو موجود بسلطه بيتزا اكسبرس لكن كان لذيذ
كرانبيري مجفف
فلفل ملون مشوي بالفرن
بقدونس مقطع
قطع ديك رومي ( مالت المطعم مع دياي لكن ماعندي ممكن تلغون التركي او الدياي)
الصلصه
مايونيز يخفف مع خل وعليه رشه بهارات الشايب
وبالعافيه 😋👌🏻
مطعم رايس بول في البحرين
جربنا فرع مجمع السيف المكان شرح وايد ومرتب
المنيو فيه كل شي اكل بحريني واكل صيني واكل هندي
ومنيو الريوق شكله وايد حلو بس للاسف ما مدانا نعيد الزياره عشان نجربه
جربنا مرقه الهامور البحرينية كانت وايد لذيذه
مع المقبلات الشرقيه والتندوري الهندي
المنيو كبير وفيه خيارات متنوعه يستحق تكرار الزيارة
اضغط عالصور لوضوح اكبر
سبيتال فيلد ماركت واحد من اقدم الاسواق في لندن
متوزع فيه مطاعم ومحلات وفي كشكات اكل
اقرب محطه اندرغراند لها اهي محطه الدغيت
السوق يفتح يوميا من الصبح لي ٥ المغرب
اضغط عالصوره لمشاهدة اوضح
هذي فيديوات للماركت
مطعم فله في دبي
يقدم البرغر الامريكي والباستا
الديكور وايد حلو وفيه العبارات الاماراتيه والصور موزعه عالمحل
جربنا عندهم البرغر الكلاسيك مع الجبن
كان البرغر حجمها صغير لكن لذيذه وجوسيه
وجربنا الربيان السبايسي كان كرنشي ولذيذ
خوش مطعم للبرغر انصح فيه
مطعم فله في شارع الجميرا
في مدينه النهر (ريفير لاند) في دبي باركس بجانب الليغو لاند
تغدينا فيها واخترنا مطعم غاليتو
اول مره اسمع عنه واجربه
طلع مطعم قديم من سنين في جنوب افريقيا وعقب طلعت فروعه للعالم
الي يحب ناندوز هذا نفسه بالضبط دجاج بخلطه البيري بيري
الدجاج ترف وجوسي ولذيذ حبيناه
وعندهم بعد صلصاتهم الجاهزة للبيع
جبده الدجاج مع حمسه البصل والطماط وايد لذيذه
العيش بعد بهاراته حلوه وخبز الثوم على جنب هم لذيذ
حق الاطفال اصابع دجاج مقلي ترفه وجوسيه
خوش مطعم غاليتو انصح فيه لمحبي الدجاج المشوي
كافيه بتيل ارسل لنا دعوة لتجربه المنيو الموسمي
في فرعهم الجديد بالكويت في البدع
المكان وايد شرح وكبير النور يدخل من كل مكان
عندهم بعد قعده خارجيه وايد حلوة خاصه مع الجو الحلو هالايام
يقدمون سلة خبز مع خل البلسميك وزيت الزيتون البكر علما يوصل الطلب
انصحكم تجربون خل البلسميك عندهم واايد مميز وفيه نكهه التمر
خذت معاي قرشه البيت شي لذيييذ والوضع لا يوقف
بدينا بالشوربات
شوربه القباقب وشوربه المشروم
سلطه العدس بطريقه بتيل
سلطه جدا لذييذه حبات عدس مع طماط وجبن موزريلا
وعليها صلصه البلسميك الخاصه فيهم اللي حبيتها
صدر دجاج مع عيش بالزعفران
حبيت الدجاج جدا ترف وجوسي
باستا الاجبان الثلاثة وطلبت معاها اكسترا دجاج
جبن البارميزان كان طاغي عالطعم
وختمناها بالتوفي بودينغ
شي مميز ولذيذ لمحبي كيك التمر وصلصه التوفي
فوندان الكاكاو
كانت من الدارك شوكليت
زياره لذيذه وخدمة ممتازه وموقع حلو وشرح
اكرمكم الله كافيه بتيل وشكرا عالضيافه
بالكويت عندهم فرعين واحد بالافينيوز والثاني في البدع توه فاتح
وهذا فيديو لتجربتي في كافيه بتيل من صفحه انستغرامي
كافيه كوكي دو في مجمع سيمفوني بالسالمية
متخصصين بالكوكيز والحلويات
طرشوا لنا نقصه رمضان علبه حلويات وكيس ميني كوكيز
شكل العلب والتغليف واااايد يشوق حبيت العلب السودة معطيها فخامة
داخل العلبة الحديد
فيها كوكيز كبار بحشوات متنوعه جالكسي وكندر
وقطع براونيز ترررفه
وشيزكيك ميني
وهذا جيس الميني كوكيز ملحوم ومسكر عدل لما فتحته الكوكيز داخله ترفيييين
حبيتهم اكثر من الكبار
من غير مبالغه من الذ الكوكيز اللي ذقته الحجم الميني
مشكورين عالنقصة
كافيه كوكي دو في سيمفوني مول بالسالمية
وهذا رقم توصيل المنازل
25770718
96644875
وهذا حسابهم الانستغرام
مطعم جوز كراب شاك مطعم امريكي متخصص بالاكل البحري
المطعم عنده سلسله فروع منتشره بامريكا واول فرع يفتح بره امريكا في دبي الامارات في دبي مول
مقابل الاكواريوم وانت تاكل تشوف السمج رايحين ورادين 🙂
المطعم صار له ٦ شهور فاتح تقريبا
لاحظت في هذي الغرفه الموظفين قاعدين وياكلون فيها
مادري هل يجربون الاطباق او هذا مكان استراحتهم
حسيت شغله حلوه بالمطعم يقدرون موظفينهم
لازم رول الكلينس حق الاكل البحري لان لازم تكسرون القباقب وام الربيان وتصير معركه 🙂
وتب الكبير اللي ورا عشان نقط فيه القشور
هذي عده التكسير 🙂
بسم الله نبدا 🙂
طبق المقبلات هذا نصحنا فيه مدير المطعم
وكان صج لذيذ
الكلاماري فريش وكرسبي وكرات الجبن بعد لذيييذه
اما تغميسه القباقب بالجبن كان زفر شوي
طلبنا جدر ام الربيان كان حجمها كبير وراهي ومعاها بالجدر وايد شغلات لذيذه
مثل الربيان والمحار والذره والبطاط المفيوح وقطعه صوصج كبيره
توقعت البطاط والذره يصيرون زفرين بما انهم بنفس الجدر لكن بالعكس كل شي كان لذيذ وبدون اي زفره كلش
بس المشكله معاي كان ان اللوبستر والربيان مافيه نكهه مفيوح بس احبه مع صلصات
فطلبت صلصه ليمون بالزبده للتغميس
وبما ان يايين مطعم كراب لازم نجرب الكراب 🙂
القبقب كان جدا ضخم وتكسير الايد وتعال طلع اللحم كان مغامره الصراحه
ماينفع حق الناس اللي يايه المطعم بتكشخ يعني لازم تطب رواسي بالجدر وعقب في مغاسل تغسل ايدك بالصابون
بس القبقب ماعجبني وايد ام الربيان كانت وايد الذ
كانت تجربه حلوه بس يبيلها مزاج ان تقشر وتوصخ ايدك
اللي يحب الاكل البحري وبسعر مناسب لازم يجربه
موجود المطعم في دبي مول بالطابق العلوي مجابل الاكواريوم
مطعم ماكي من اول المطاعم اليابانيه اللي انشهرت بالكويت
وقدموا لنا اطباق السوشي بنكهه تناسب ذوقنا الخليجي صار لهم اكثر من ١٠ سنين
وحاليا عندهم فرع في لندن
كانت لي زياره ل لندن قبل فتره بسيطه وكلمنا اصدقائنا عائلة ماكي ان لازم في فترة زيارتي اجرب شغلكم مايصير ارد الكويت وماجرب فرعهم في لندن
الى الان ما افتحوا المطعم لكن ماقصروا قدموا لنا من اطباقهم المشهوره لكن بشكل يختلف عن فروعهم بالكويت
المطعم في لندن في منطقه سوهو وبالتحديد في شارع دين
الشارع متروس مطاعم وحلو للتمشي
ومطعم ماكي كان طابقين قعدنا بالطابق العلوي
كالعادة الديكور راقي ونفس اجواء ماكي والخدمة ممتازه مع ان لي الحين ما افتحوا
Spicy Edamame
الادمامي السبايسي طبق موفق نبدا فيه
Crispy Salad
سلطة الكرسبي نفس اللي بفرع الكويت لكن بشكل ثاني وطعم ألذ
Fried Oysters
محار مقلي كان حامض ولذيذ
Filo Prawns Tempura
ربيان مقلي كرنشي وخفيف
Chicken Plum Sauce
دياي بصلصه سويت واايد ترف وجوسي كان جدا لذيذ
Kaifii Maki
وبما ان احنا عندهم الشيف طلع لنا كيفي ماكي اللي سووه لنا باسمنا من قبل ٣ سنوات
اللي ماجربه لازم يجرب كيفي ماكي تلاقونه بكل الفروع 🙂
وهذا رابط عن الطبق كيفي ماكي
Essa Maki
وهذا عيسى ماكي المشهور لكن بالشكل اللندني 🙂
Kappa Zume
Tartufo Yaki Udon
اودون اهو نوع متين من النودلز مع الفقع والمشروم
Tiramisu
وختمناها بحلو التيراميسو الخفييف
الصراحة كانت زياره ممتعه ولذيذه
ومكان ماكي وايد حلو في سوهو اصلا لندن بكبرها حلوة وكلشي فيها حلو
اشكر ماكي عالضيافه واتوقع لهم نجاح قوي في فرعهم بلندن
راح يفتح في شهر فبراير رسمي يعني احتمال عالاسبوع الياي
ممكن تتابعون حسابهم الانستغرام وتشوفون اذا افتحوا ويستقبلون الزباين
اذا رحتوا لندن انصحكم بغدا او عشا في ماكي اهناك 🙂
مطعم كريب افير مطعم فرانشايز من بريطانيا صار له اكثر من ١٠ سنين اهناك
وعنده وايد فروع ببريطانيا الحين فتح فرع في الكويت
في البدع مكانه وايد شرح وكبير المطعم وايد
لرسلولي دعوه لتجربه المنيو عندهم
المطعم يقدم الكريب المالح والحلو ويقدم الميني بانكيك هذا منيو المطعم باختصار
رحنالهم عالريوق وعندهم مجموعه لذيذه من الكريب خاص للريوق
مثل هذا الكريب
Egg Benedict Crepe
كريب داخله بيض اومليت وجبن وتركي ومن فوقه صلصه الهولنديز
كان وااايد لذيذ والكريب خفيف ولين
Margarita Crepe
كريب المارغريتا يقدمونه طول اليوم مع الطماط والريحان والكتشب
كان سويت ومالح هم حلو
والكرك طبعا للريوق لازم
وعقب طلبنا الحلو
وعندهم قهوة عربيه 🙂
Candy Crush Crepe
كريب الكندر والاوريو بالكاكاو البلجيكي
وااايد لذييييذ قالولي هذا الكريب الاكثر طلب عليه
الكاكاو البلجيكي عندهم طعمه وااايد حلو
قالي يستخدمون كاكاو كاليبو البلجيكي ومعروفه هالماركه بجودتها
Callebaut Belgian Chocolate 33%
Mini Pancake Stick
حق اللي يحب يطلب شي خفيف وصغير هذا خوش خيار
ميني بانكيك وفراوله وموز ومارشملو وعليه رشه كاكاو بلجيكي
بس حبيت الكريب عندهم اكثر من البانكيك
كريب افير موقعه حلو وانصح بكريب الحلو عنده مع القهوه العربيه
مكانه في البدع في منتجع رمال وبجانب منتجع موفمبيك
اشكركم عالدعوة
ستيشن صاج ريبابليك
ستيشن صاج وشاورما في البيت
ايبون عدتهم كامله من طاولات وغاز والاكل والمواعين البلاستيك الخ
هذي مو اول مره نجربه كنا مجربينه قبل سنه ونص وشغلهم مميز
من الحشوات الموجودة بالستيشن
الاجبان شيدر – حلوم – موزريلا – كرافت قلاص
لبنه – زعتر – فلافل – باذنجان – بطاط مقلي
نقانق – مرتديلا – ببروني – تركي
خضار خيار – طماط – زيتون – جرجير – مخلل
كاكاو كندر – نوتيلا – بينت بتر
الصاج عندهم ٣ انواع
ساده
احمر بالشمندر والفلفل
اخضر بالزعتر
شاورما دجاج
الكمية كانت راهيه والكل اختار اللي بخاطره
والموظفين بروفشنال وسريعين وعارفين شغلهم
والزايد حطوه لنا بمواعين قصدير كبار
خدمه ممتازه دقيقين بالوقت وسريعين بالشغل والطعم لذيييذ
من افضل ستيشن الصاج اللي مرت علي
هذا تلفوونهم للحجز والاستفسار
97530030 – 97980815
وهذا حسابهم الانستغرام
وهذا موضوعي عن تجربتي السابقه معاهم
Saj Republic صاج وشاورما في البيت من صاج ريبابليك
كل الشكر عالاكل الطيب
مخبز يامانوت او يامانوتي الياباني في دبي
اهو مخبز فتح اول فرع له بالامارات والشيف ياباني
يقدمون المعجنات والمخبوزات الاوروبيه بلمسه يابانيه
سمعت عنه من الاهل وقلت لازم اجرب منه
طريقته يعرضون لكم الاكل وانتوا تاخذون الصينيه وتاخذون القطع اللي حابينها بنفسكم
وعقب تعطون الغرسون الصينيه عشان يسخن لكم اللي اخترتوه ويقدمونه لكم بصحون
فكرته مثل بريد توك تقريبا لكن نوعيه واصناف الخبز اللي مقدم غير
جربنا الدونات بالشكر وهذي الثانيه بالكاكاو
كانت الدونات وااايد لذيذه
بس اللي فيها كاكاو كانت ماصخه تحتاج كاكاو زياده
فرنش توست بالسكر البودر
جيده لكن مو الافضل عندهم
صمونه البلاليط كان ودي اجربها
بس كنا مخلين مجال للغدا 🙂
الفكره وايد حلوه في عرض الصمون
بس عيبه كان الذبان يطير عالخبز والمعجنات كان يضايق
يبيله يسكرونه او يغطونه
الاشكال تشووووق يبيله زياره ثانيه لتجربه باقي الشغلات
ايس تي لاتيه كان غير موفق للاسف
اول مره اكل من مخبز ياباني
كانت تجربه حلوة وشغلهم ترف وعندهم افكار وايد من الصمون والمعجنات
اللي داخلها بلاليط او نودلز او كاري
والكرواسون بانواعه
عندهم ٣ فروع في دبي
وانا جربت اللي موجود في دبي مول بالسرداب تحت صوب الشلال
