في زيارتي السابقه لدبي وقع الاختيار على فندق بولمان سيتي سنتر الديرة
كان يوجد عليه عرض مميز مع طيران الامارتية
الفندق ٥ نجوم وقريب من المطار
وفي مجمع سيتي سنتر الديرة
الغرفة واسعه ومريحه ونظيفة وفيها كل مقومات الرفاهية من شاي وقهوة وشامبو وغيرها اللي متوفره في فنادق ال٥ نجوم
ميزته متصل بالمجمع ندخل للمجمع من الطابق الثاني للفندق
والمجمع كبير وفيه سينما ومطاعم عالمية وكارفور غير المحلات المتنوعه
ونصيحه اخذوه مع الريوق لان بوفيه الريوق وايد حلو وكبير ومتنوع
اختيار جميل وموفق
فندق وستن البحرين
كان اختيارنا في السفرة الاخيرة للبحرين
اول شي لان سعره جدا مناسب وثاني شي عشان موقعه المميز في مجمع سيتي سنتر البحرين
حجزنا غرفتين ديلوكس كونكتيد اللي يكونون متصلين بباب بينهم
وطريقه حجز هذا النوع من الغرف لازم عن طريق الاتصال عالفندق
او ممكن تكتب ملاحظة على موقع الحجز انك تبي غرفتين متصلين بباب
الغرفة حجمها وايد راهي وكبير والمنظر المطل عالشارع الرئيسي وايد شرح
نظافة وراحة استمتعنا الصراحة
الحمام طوفته زجاجيه ممكن تخليها شفافه او تعتمها هم يعطي حجم اكبر واشرح للغرفه
مدخل مباشر من داخل الفندق عالمول
والخدمة كانت ممتازة
سنين وانا ازور دبي ودايما اشوف فندق غراند حياة ولا مره فكرت اني اجربه
سكنت فيه في زيارتي لدبي الاسبوع اللي فات
وفاق الفندق كل توقعاتي
اللوبي كبييير وشرح وفيه شلال ماي وحديقه داخليه
اخترت الغرفه العادية وكان حجمها وايد كبير وشرحه فيها مكان كبت الملابس منفصل
والحمام كبير ومقسم لدوش ومرحاض والمغاسل
والفراش وااايد مريح
وطوفه الغرفه كلها من زجاج شررحه مطله على برج خليفه وناطحات السحاب
ولازق بالفندق سينما والوافي مول
وجربت خدمة الغرف مرتين كان اكلهم ممتاز
وبوفيه الريوق مايتطوف كل شي يخطر على بالك ماتخلص منه من كثر الخيارات
الصراحة انصح فيه وسعره مقارنه بفنادق دبي يعتبر ممتاز
اصغط عالصور لمشاهدة اوضح
زرنا البحرين قبل اسبوع وسكننا في فندق
فريزر سويتس السيف
هذا الفندق يعتبر شقق فندقية وجربته في لندن وحبيناه
Fraser suites London تجربتي لفندق فريزر سويتس لندن
حجزت الفندق من موقعهم الرسمي طلع ارخص من كل مواقع الفنادق من بوكيننغ واغودا وغيره
المميز فيه انه في مجمع السيف والدخول للمجمع عن طريق اللوبي
ننزل المجمع في اي وقت للريوق او الغدا او السينما او للتسوق
والمجمع حلو فيه كل شي للاطفال والكبار
اضغط عالصور لوضوح اكبر
الصراحة تجربه ممتازه الفندق مريح ونظيف والخدمة خمس نجوم
وموقعه ممتااااز بمجمع السيف وبجانبه مجمع العالي تروح له مشي
اذا حصل لي اكرر السكن فيه بالمستقبل
bahrain.frasershospitality.com
Fraser Suites Queens gate London
فنادق فريزر سويتس عالميه وعندهم فروع في اكثر من ٢٤ دوله بالعالم
هذي الفنادق ميزتها انها شقق فندقيه عندهم الاستوديو والشقه بغرفه او غرفتين
وفيهم خدمة فندقيه يعني تنظيف يومي للغرفة
جربنا الفندق فرع كوينز غيت في لندن
اللوبي صغير وايد
اخذنا استوديو حق شخصين وعطونا استوديو اللي سقفه عااالي وااايد شرح وعالشارع
الغرفه وااايد واسعه اكبر من الغرف اللي متعودين عليها بفنادق لندن
والسقف العالي الصراحة كان ميزه حلوة
ركن المطبخ فيه ثلاجة ومايكرويف وجوله وكامل معدات الطبخ
للاسف الفراش كان مو مريح ١٠٠٪ كان فيه خفقه بالماتريس
الشامبو وايد حلوة ريحته ماركة لوكسيتان
داخل الغرفه حاطين لنا هالتلفون نظام اندرويد
فيه انترنت ومكالمات مجانيه ودليل سياحي خدمة لزباين الفندق
تاخذ التلفون معاك لما تطلع وترده مكانه وقت الشيك اوت
اول مره يصادفني فندق يوفر لسكانه تلفون بخط ومكالمات وانترنت مجاني
صج ان ما استخدمناه لان عندنا خطوطنا الخاصه بس هم ميزه حلوة
وهذا المنظر من غرفتنا
الفندق ميزته ان الغرف واسعه وفيها مطبخ وقريب من محطه الاندرغراوند غلوستير
في تحته تيسكو وجمعيه ويتروز الكبيره وشارع مطاعم تحته
من المطاعم بايرون برغر وكنتاكي وبرغر كنع وناندوز واسك ايتاليان وكافيه بول وبريت وغيره
وموجوده صيدلية بوتس
مكان الفندق حلو ان فيه خدمات تحته لكن بعيد عن شارع الاكسفورد اللي يحبونه العرب
يبيله ١٥ دقيقه بالاندرغراوند لي شارع اكسفورد
دبي باركس اند ريزورتس
حدائق دبي الجديدة اللي فيها ليغو لاند
مكان كبير مخصصينه للالعاب موجود في نهايه دبي في طريق اللي يودي ابوظبي
الحدائق الموجودة او الاماكن فيها
ليغو لاند /ليغو لاند المائية / موشن غيت / بوليوود / مدينه النهر للمطاعم
فندق لابيتا
تذكره الدخول لكل مدينه او حديقه منفصله
الا اذا اخذت تذكره شامله وحاليا في عرض حلو لنهايه يناير يشمل ٣ حدايق ب ٣٠٠ درهم للشخص
الليغو لاند فيها اكثر من قسم داخلها منها الملاهي والالعاب والمطاعم السريعه ومصنع الليغو وغيرها
المدينه ممتعه وكبيره وايد يحتاج لكم يوم كامل للعب فيها
ليغو لاند المائيه مفتوحه حاليا وتستقبل الزوار لكن ما دخلنا لها لان الجو حاليا بارد قلنا نرد لها بالصيف افضل
الموشن غيت اهي حديقه كامله فيها بعد العاب وملاهي للاطفال والكبار ومقسمه بعد على حسب الاستوديو اللي انتج الافلام
مثلا قسم دريم ووركس فيها مدغشقر وشريك وهاو تو ترين يور دراغون وكونغ فو باندا
وقسم كولمبيا ستوديو فيه ذا ميت بولز ووهوتيل ترانسلفينيا
وفي مدينه السنافر الحديقه كبيره وتحتاج يوم كامل للاستمتاع بكل العابها
بوليوود هذي ما دخلناها صار الليل وتعبنا ومشينا هذي تنفع للي يتابع الافلام الهنديه
مدينه النهر هذي الدخول لها مجاني ومفتوحه فيها بس مطاعم ومحلات للتسوق والمطاعم اللي فيها عالميه ومشهوده وذات مستوى
العادة في مدن الملاهي تكون المطاعم سريعه محليه وخاصه بالحديقه وغاليه والاكل دون المستوى
وفندق لابيتا هذا تابع لفنادق ماريوت
الميزه فيه ان تريح العصر بالفندق وترد تلعب بالحدايق وان تذاكر الحدايق مجانيه خاصه ان سعر التذاكر غاليه
لكن شيكت على سعر الفندق يعتبر غالي
السفره هذي لدبي كانت عائليه فاحتجنا شقق فندقيه
واخترت شقق روضة امواج سويتس
لان سعرها معقول و٥ نجوم وموجوده في الجي بي آر يعني تحتنا منطقه سياحيه
اللوبي
الشقه واسعه ومريحه ونظيفه
المطبخ كبير ومجهز بكل شي من مواعين
ما استخدمناه لكن راح يفيد الناس اللي بتطبخ
غرفه توين
وداخلها حمامها الخاص
وهذي الثانية ديلوكس مع حمامها بعد
في بلكونه كبيره مع كراسي وهذا المنظر المطل منها
حمام سباحة لكن ما نزلنا فيه لان الجو كان بارد
خيار موفق الصراحة
موقعهم ممتاز والشقه كبيره ونظيفه والسعر معقول
في زيارتي الاخيرة للبحرين
اخترنا فندق روتانا ماجستيك ارجان
المميز فيه ان قريب من المطار وانه شقق فندقية تناسب العوايل
في منطقة المحرق وبالذات في البسيتين
اخذنا سويت فيه غرفتين نوم ل٤ اشخاص
عندهم نظامين للسويت واحد دوبلكس تصير الصاله تحت وتركبون الطابق اللي فوق لغرف النوم
وفي السويت اللي يكون كله طابق واحد للناس الكبار اللي مايقدرون يركبون الدرج
السويت ماشالله راهي وكبير قعده راهيه وطاوله طعام ل ٦ اشخاص
والمطبخ بعد كبير وفيه كله شي من فرن وجوله وغساله صحون
مع ان خدمة الغرف ينظفون المواعين كل يوم نخليهم بالمغسلة
ومتوفره بعد غساله ملابس واوتي الهدوم
وهذا شكل الدرج لغرف النوم فوق
السرير مريييح وناااعم والمنظر شرح خاصه ان الدرايش كبااار على كبر الطوفه
السويت فيه ٣ حمامات
واحد في الصاله والثاني في غرفه النوم مع دش والثالث بالغرفه الثانيه مع بانيو
الغرفه الثانيه ممكن تختارون سرير كبير كنغ او سريرين توين
هذا الحمام مع البانيو
المنظر من البلكونه على مستشفى الملك حمد الجامعي
وحمام السباحه مفتوح يوميا لي ال٩ بالليل
وعندهم جيم للرياضة ومنطقه العاب للاطفال دوارف
الصراحة الفندق وايد حلو واسعاره معقوله على الخدمة المتوفره
كانت تجربه ممتعه ومريحه بهالفندق واكيد راح نقعد فيه مره ثانيه اذا احتجنا سويت
في زيارتي الاخيره لدبي سكنت في فندق موفمبيك ابن بطوطة
كان سعره مناسب في فتره كانت كل الفنادق غاليه
وقلت بما انه ملاصق لمجمع ابن بطوطه هم ميزه اذا حبينا نتسوق او نتمشى فيه
الفندق بعيد شوي عن برج خليفه ودبي مول
اللوبي للفندق خيااااالي ماودك تركب الغرفه وتهد هالمنظر
خذنا غرفه ديلوكس والمنظر مطل عالشارع صوب البر كان كلش مو حلو المنظر
الغرفه مريحه ونظيفه وواسعه
صار لنا موقف مع الفندق ان طلبت ثلج من خدمه الغرف لشرب الكولا احبه مع ثلج
لكن قالوا الثلج ب ٢٠ درهم استغربت وحزتها كان بخاطري الكولا فقلت اوكي طرشوا الثلج
وبنفس الوقت ارسلت ايميل شكوى لشركة موفمبيك الام وقلت لهم هذي خدمه بسيطه في فندق ٥ نجوم معقوله يدفعونا عالثلج
رحنا حق سلسله فنادق مختلفه وكانت خدماتهم مميزه وانتوا تدفعونا عالثلج
وطلعنا ورديت الكويت ونسيت الموضوع ولا واصلني بعد اسبوع ايميل من الشركه الام تعتذر عاللي صار
وبلغوني ان مبلغ الثلج راح يرد بالفيزا وانهم بالعاده ماياخذون فلوس عالثلج وهذا خطأ صار من فندق ابن بطوطه
حلو ان في اداره تتابع فنادقها وترد عالشكاوي وتعالجها
فندق اوبروي دبي من الفنادق ذات ال٥ نجوم اللي شفت تقييم جدااا عالي لها في النت
وصل الى ٩.١ ومعظم الريفيو عنه راضيين عنه الناس وحابينه
سلسله فنادق اوبروي عالميه واصلها فنادق هنديه
مكانه بجانب برج خليفه ٥ دقايق بالسيارة
حجزت عندهم للويكند
الفندق مكانه للاسف كلش مو حلو مدعوس بين مباني عاليه وجاري بنائها يعني مو على شارع رئيسي
واللوبي واايد صغير
الحين انيي للغرفه
وااايد شرررحه وواسعه ومريحه ونظييفه والاثاث مودرن
والحمام تكرمون حجمه كبييير كبر غرفه بفنادق ثانيه
الحلو بالغرفه زياده على حجمها الكبير اهي الطوفة كلها من زجاج من فوق لي تحت شرررحه
لكن المنظر لغرفتنا مو حلو صوب مباني جاري انشائها
طبعا في عندهم منظر مقابل حمام السباحه ومنظر صوب برج خليفه لكن لازم تدفع زياده
وسعر الفندق جدا غالي الصراحة على مكانه
في فنادق بنفس السعر وخمس نجوم ومكانها وااايد افضل مطله على شارع رئيسي او على البحر او على مول
الفندق حلو لكن غالي بالنسبه لموقعه
اكيد بالمستقبل بختار فنادق ثانيه
واعطيه تقييم ٧ من ١٠ لان عندي الموقع جدا مهم
الاكل من خدمة الغرف كان للاسف مو حلو كلش
عجبني بس طبق الاجبان كان وايد لذيذ
صار لي فتره ما كتبت بالبلوق من اجازه العيد
اللي قضيناها في دبي
قبل العيد بشهر بحثت عن افضل العروض لدبي في العيد
ولاحظت طبعا غلاء الاسعار بالفنادق اللي نحبها مثل ذا ادريس ومينا السلام واتلانتس
ولقيت موقع بريطاني اي بووكرز يعطي باكج تذاكر سفر مع الفندق بسعر اقل من المواقع الثانيه
JBRولقيت فنادق ال
اسعاهم معقوله لعطله العيد بالمقارنة مع فنادق الجميرا وفنادق دبي مول
واخترت امواج روتانا لقربه من الشاطئ
هذا اللوبي
اخترت غرفه ديلوكس مطله عالبحر
الغرفه وااسعه ومريحه
للاسف حمامهم تكرمون مافيه شطاف
لذلك اذا بتحجزون فيه يفضل اتييبون ابريجكم النايلون معاكم 🙂
وطلبنا على يوم الريوق العربي
وايد حلو انصحكم تجربونه متنوع وفيه كل شي
من بيض وحلوم وفول ولبنه وانواع خبز مع الزبده والمربى والعسل
وهذا المنظر من غرفتنا
يطل عالبحر وعلى ممشى الجي بي ار ذا ووك
ويوم العيد عيدوا علينا بالحلويات العربية
وهذا باللوبي
شاطئ الجميرا اللي مقابل الفندق
لازم تعبرون شارع داخلي عشان توصلون للشاطئ
الشاطئ فيه كل انواع النشاطات البحرية
من طراريد وجتات والبراشوت وغيره للكبار والاطفال
ركن زحلاقيات ودوارف لليهال
وكشكات العصير والايس كريم والكنافه موزعه على كل الشاطئ
ركن للاطفال بالشاطئ نوافير ماي
والدخول بتذكره
المنظر من الشاطئ يبين فندق اتلانتس
فندق امواج روتانا كان خيار وايد حلو
عيبه الوحيد مافيه انترنت واي فاي مجاني بالغرف على عكس معظم الفنادق
ومميزاته
موجود على شاطئ حلو وموجود في ممشي الجي بي ار اللي فيه المطاعم المتنوعه والكشخه وبعض محلات المكياج والازياء
وفي سوبر ماركت صغيره وبعد في سينما كله تروح له مشي مايحتاج سياره
الجي بي ار عباره عن سوق مكشوف يعني التمشى كله بره
لذلك بالصيف وايد حار ويضايق حلاته بالشتا حق التمشي
معروف ان تكاسي لندن غالية وايد
بحثت بالنت عن تكاسي رخيصة ولقيت موقع رسمي فيه لسته طويله من شركات التكاسي وباسعار رخيصه جدا
ارخص بكثير من اسعار تكاسي المطار او لندن
سعر التاكسي من المطار لي لندن حوالي ٨٥ الى ٩٠ باوند
لكن مع هذا الموقع ميني كابيت سعر التاكسي ٣٣ باوند يعني اقل من نص السعر
جربت احجز تاكسي من مطار هيثرو الى الفندق وبالعكس
المواعيد مضبوطه وسياره التاكسي جديدة ونظيفة والسعر رخيص ومحدد يتم دفعه بالنت واذا حاشتنا زحمه
مايزيد السعر نفس السعر المحدد
هذا موقعهم بالنت للحجز او ممكن ببرنامجهم عالايفون والاندرويد
اذا كنت حاجز تاكسي يستقبلك بالمطار
يفضل تحط ساعة استقبالك بالمطار بعد ساعه من وصول الطيارة تتيح فرصه اخذ الجناط وتختيم الجوازات او اي تاخير بالطياره لان اذا تاخرت ربع ساعه عن التاكسي يمشي عنك
حجزت وانا بالكويت التاكسي من التيرمنال ٤ من مطار هيثرو الى الفندق
واول ماوصلنا بوابه الخروج لقيناه حامل ورقه كاتب فيها اسمنا وكان متصل علينا بالمطار
السياره كانت فورد جديدة وصلنا الى باب الفندق
والعكس بالخروج من الفندق لي المطار كان موجود عند بوابه الفندق بالوقت المحدد بالضبط
الموقع بروفشنال اتصلت عليهم وردوا علي بسرعه وفي مساعده اونلاين على طول
انصح فيه للي يبي تاكسي حق لندن او بريطانيا
زرت لندن في بداية هذا الشهر
وبحثت عن فندق مناسب في النت
لكن اكثر الفنادق في شارع اكسفورد حجم غرفتها صغير (جربت السنة الماضية فندق كمبرلاند غومان لكن غرفتة وااايد صغيره مايقدر الواحد يتحرك فيها وكان مستواه مو ذاك الزود
ولقيت تقييم حلو بالنت لفندق ذا لاند مارك ٥ نجوم وحجم الغرفة واسعة وموجود في لندن ماريلبون
booking.com العادة احجز من موقع بوكنغ دوت كوم
لكن لقيت عرض واايد حلو في موقع اغودا دوت كوم لنفس الفندق ونفس الغرفة وارخص ب١٥٠ دينار عالسعر الكامل
وهذا شكل اللوبي وايد شرح وكبير
غرفتنا سوبيريور
واسعة ومريحة واهم شي نظيفة يستاهل ٥ نجوم
الحمام في رشاش ماي او شطاف وهذي ميزه واايد حلوة بالفندق
هذي ضيافتهم اليومية انواع شاي وقهوة وبسكوت
يوميا اييبون لنا ماعون تمر وبقلاوة والصراحة احنا مو من محبي التمر
بلغتهم يغيرون الطبق ويابوا لنا مره فراولة بالكاكاو وبالمرات الثانية ماعون فاكهه
كانت اسوء نقطه بالفندق ان يوميا لازم ابلغهم ان ما ناكل التمر وغيروا لنا الطبق
ويوميا اي كوب او قلاص وسخ ياخذونه ومايردونه
ولاااازم يوميا اطلب منهم يرجعون لنا الاكواب اذا بنشرب شاي او قهوه
اعطيهم ٨ من ١٠ بسبب سوء خدمة الغرف
من مميزات الفندق
موقعه وايد حلو لان قريب من محطة ماريلبون الاندرغراوند ومحطة القطار ومحطة الباص
المحطه مقابل الباب الخلفي للفندق
المحطة فيها قهاوي وكافيهات وبرغر كنغ
ومقابل الفندق جمعية ماركس اند سبنسر وايد حلوه للتسوق السريع اذا حابين تاخذون شغلات للريوق او العشا او للسناك
وفي جمعية تيسكو بعد بجانب الفندق مشي ٥ دقايق
وبنفس شارع الفندق متحف مدام تيسو
وبجانبنا بعد شارع بيكر المشهور للمطاعم مشي ١٠ دقايق بس وموجود فيه بعد متحف شارلوك هولمز
وحديقة الريجنت بعد بجانبنا مشي ١٠ دقايق
باختصار موقع الفندق وايد مميز وغرفه نظيفة وواسعه والحمام فيه شطاف ماي
وراح اكتب تجاربي للمطاعم والكافيهات والمتاحف بلندن
عطلة عيد الفطر هالسنة كانت طويله وحلوه
واستغليناها بسفره سريعة لدبي
اول مره نعيد بره الكويت وكان العيد في الامارات عجيييب وكسر للروتين المعتاد في كل عيد
على طول حجزنا في منتجعنا المفضل الجميرا
في فندق ميناء السلام
نفضل منتجعات الجميرا في دبي لان فيه مميزات حلوه
مثل شاطئ خاص كبييير ومطل على برج العرب
دخول مجاني لمدينة وايد وادي المائية يوميا
مطل الفندق على نهر صناعي والتنقل فيه بالقوارب اللي يسمونها العبرة
فيه ٤٤ مطعم راقي
نادي للاطفال فيه العاب للاطفال وفيه حمام سباحة صغير مع زحلاقيه ورشاشات ماي للاطفال
سوق مدينة الجميرا سوق صغير فيه انتيكات وتذكارات
باختصار مانحس بالملل وما يحتاج نطلع من الجميرا
من قبل كتبت عن تجربتنا في فندق ميناء السلام
بس لما زرناه هالمره كان الفندق مجدد والاثاث جديد
والتصليحات بتنتهي في شهر سبتمبر
يتميز لوبي الفندق بهذا الحوض اللي متروس ورد جوري فريش
زرنا الفندق في اخر يوم رمضان
ولحقنا على ديكورات رمضان والافطار فيه
هذا شكل الغرفة بالديكورات الجديده
صارت موديرن اكثر
الغرفة حجمها كبير وراهي ومريحة
النظام فيها كله باللمس
الاضاءة والتكييف وزر عدم الازعاج وزر تنظيف الغرفة موجود على الكميدينات
الحمام ماتغير مثل السابق
الصابون والشامبو وكل اغراض الحمام تكرمون من أمواج
المنظر المطل من غرفتنا
خيااال
تحتنا السلاحف
كل يوم حاطين لنا شكل جديد 🙂
في كل ليلة لازم يحطون لنا كاكاو باتشي مع شي اخر
صباح يوم العيد
حلويات مشكلة
ثاني العيد
ثالث العيد
تفاجأت بهذي العلبة
من كااااارتييير مستحيييل
طلع كاكاو 😦
خيبه امل 😦
عالاقل حطوا خاتم سلسله فص اي شي 🙂
بس كان الكاكاو سويسري لذيذ
في الممرات المائية بالفندق
الشاطي كبير ونظيف وموفرين جميع انواع الالعاب البحرية
ويبين من بعيد فنادق نخلة الجميرا ومنهم اتلانتس
من شاطئ مينا السلام
شكل الفندق بالليل
ثاني زياره لنا لفندق ميناء السلام وثالث زياره لنا لفنادق الجميرا في دبي
فخم هادي مريح ممتع
وماعندنا اي مانع للسكن فيهم مره ثانية بالمستقبل
Disney Land Hotel
قبل سنتين زرنا دزني لاند باريس وسكننا في فندق نيويورك ٤ نجوم
قلنا نجرب فندق ثاني هالمرة
واخترنا فندق دزني لاند ٥ نجوم
اكيد اللي زاير حديقة دزني لاند باريس شاف الفندق لانه لازم تمرون تحته للدخول لحديقة دزني
ميزة الفندق انه على مدخل الحديقة مشي دقيقتين فقط
هذا شكل اللوبي
توقعت ان يكون فيه رسومات لشخصيات دزني او يكون له طابع دزني
لكن الفندق كان شكله ريفي وحاطين جم مجسم لشخصيات دزني فقط
حسيته ماله شغل بدزني لاند الا بعض المجسمات البسيطه باللوبي
غرفة ديلوكس والسرير حجمه راهي حجم الكوين
وحجم الغرفة معقول واسعه
الغرفة مطله على مدخل حديقة دزني
عطونا نوتة وقلم لاخذ توقيع الشخصيات
جنه صج عاد 🙂
الميزة بالفندق ان شخصيات دزني تكون موجودة عند مطعم الريوق داخل الفندق
وكل نص ساعه في شخصية اخرى
للتصوير معاها واخذ التوقيع 🙂
الاطفال راح يحبون هذي النقطة
لان في حديقة دزني لاند تلاقي الشخصيات، لكن عليها طااااابور طويل للتصوير معاها
لكن بالفندق بكل سهولة تقابل الشخصيات وماتضيع الوقت عليك بالانتظار
حتى بلوتو يوقع بعد 🙂
عادي وانت ماشي بالفندق تلاقي شخصية تطل عليك او ماره بجانبكم
هذي ميزة الفندق ومو متوفره بباقي الفنادق
بوفية الريوق او الافطار مع سعر الغرفة
البوفيه متنوع فيه البيض وانواع الخبز والكرواسون والمربيات والكورن فليكس
وعصاير واشربة ساخنة
وكاتبين على كل طبق اذا كان فيه خنزير او دجاج او غيره
يسهل علينا الابتعاد عن الاطباق اللي ماتناسبنا
الكرواسون والدونت خياااال
شكل الفندق بالليل
جربنا مرة خدمة الغرف وكان العشاء لذيذ
كل يوم يحطون لنا طبق ضيافة بغرفتنا
سكننا فيه اسبوع
بس صورت لكم جم طبق
فندق دزني لاند اهو الفندق الوحيد ٥ نجوم من فنادق دزني السبعة
سكننا فيه لمدة اسبوع مريح ونظيف وقريييب عالحديقة
خطوتين ولا احنا داخل الحديقة وهذا مدخل الحديقة تشوفونه بالصوره مباشره تحت الفندق
جربت فندقين من فنادق دزني
هذا الفندق دزني لاند وفندق ثاني اسمه نيويورك
فندق نيويورك ٤ نجوم لكن للامانه ما حسيت بفرق بين الفندقين
الاثنين نفس المستوى تماما يمكن الفرق الوحيد ان فندق دزني لاند يقدمون طبق ضيافة يوميا وان المغسلة في الحمام تكرمون من رخام وقربه من الحديقة
لكن فندق نيويورك يحتاج مشي ١٠ دقايق فقط ومايحتاج سياره
ويعتبر قريب ايضا
وسعر فندق دزني لاند سعر ليلته دبل فندق نيويورك
اعتقد بالمستقبل راح نسكن في فندق نيويورك لان نفس مستوى فندق دزني لاند والسعر ارخص بوااايد وقريب من الحديقة
بعد زيارتي لمطعم كوشينا بحلتة الجديدة
وزعوا علينا طريقتهم الايطاليه في عمل الباستا بالمقادير
وقلت احطها لكم بالتفصيل هني بالموقع
المكونات
١٠٠ جرام من باستا فندق ميسوني المحضر طازج في مطابخنا
١٠٠ جرام من الزبدة
فص ثوم
١٥٠ جرام من الفطر البري
ملعقة طعام من جبنة البارميزان
حفنة (ملء اليد) من البقدونس المفروم
حفنة صغيرة من أعشاب الثوم المعمر
رشة ملح
رشة فلفل أسود
طريقة عمل الباستا
احضر قدراً كبيراً لتسخن فيه الماء
أضف باستا فندق ميسوني إلى الماء، ودعها تطهى لثلاث دقائق، ثم صفِ الباستا من الماء واحتفظ بقليل منه
تجهيز الصلصة
ذوب ٥٠ جرام من الزبدة في مقلاة
افرم الثوم وضفه إلى المقلاة مع التحريك، وانتبه حتى لا يحترق
خفض الحرارة، وأضف الفطر والملح، ودع المحتويات تطهو لبضع دقائق
أضف الباستا إلى المقلاة التي تحتوي على الفطر، وحركها لبضع دقائق
أضف باقي الزبدة وجبنة البارميزان وحركهما حتى تختلط جميع المكونات بينما تضيف البقدونس لإضافة النكهة
أضف الثوم المعمر وقدمها ساخنة
بالعافية!
الوصفه من مطابخ مطعم كوشينا فندق ميسوني
ممكن تطلبون الباستا الفريش من فندق ميسوني وتستلمونها ثاني يوم
لطبخها بنفسكم في البيت
رابط لتجربتي لمطعم كوشينا الجديد
مطعم كوشينا الايطالي في فندق ميسوني
دعانا لتجربة اطباقه بحلته الجديده
شيف جديد ، مينو جديده ، ديكور جديد
مشروب الضيافة
لازم سلة الخبز مع خل البلسميك في كل مطعم ايطالي
بوفيه صغير للمقبلات البارده
سلة ضخمه من جبن البارمزان
شكلها بروحه مغري
مو زينه لعشاق البارمزان 🙂
فريتو ميستو
مقالي كلاماري وربيان
طبق حلو ومتعودين عليه
باستا الكاسيرتشي مع المشروم
كانت جيده بس المعكرونه شويه يابسه
باستا الرافيولي مع جبن الريكوتا والسبانخ
واااايد لذيذه حبيتها وخاصه حشوه الجبن عجيبه وصلصه الطماط حامضه
فخذ الغنم مع الذره الحلوة
كانت قطعه اللحم ترفه وذايبه
بس القطعه طعمها مثل اللحم بمرقه البيت
ممكن تعجب البعض وممكن لا
بس عجبني الطبق خاصه مع خلطه الذره والصلصه
حلويات ميني ايطاليه
تيراميسو و تارت الليمون وكاساتا
حبيت التارت لذيذه
لازم شاي بعد هالوجبه الدسمه
نهضم شوي 🙂
وعطونا هديه حلوه بعد هالزياره
بالعلبه كان في باستا فريش
ممكن تطلبون من مطعم كوشينا باستا يسوون لكم اياها فريش جاهزه للطبخ
تطلبونها قبل يوم وتستلمونها ثاني يوم من عندهم
وتطبخونها بنفسكم بالبيت
بشكل عام الجو الجديد في مطعم كوشينا احلى من السابق
ديكورات المطعم صارت اوسع واشرح من قبل
وقائمه الطعام تناسب ذوقنا الخليجي اكثر
كل الشكر لميسوني وبن سري عالضيافه
زيارتي السابقه لمطعم كوشينا مع الشيف لوكاتيلي
تجربتي السابقه لقائمة كوشينا الجديده
فندق ميسوني موجود بالسالمية بجانب مجمع سيمفوني
Missoni Hotel Kuwait – Cucina
@hotelmissonikuw
تلفون مطعم كوشينا
تم دعوة المدونين على قريش في مطعم طريق الحرير
في فندق الريجنسي
للمتابعين من خارج الكويت اللي مايعرف القريش
اهي عادة كويتية قديمة يسوون فيها عشاء ويعزمون الاقارب والاصدقاء
لتوديع شهر شعبان ويستقبلون فيها شهر رمضان
كان البوفيه في الريجنسي متنوع واكثر شي فيه الاطباق البحرية
المقبلات كانت متنوعة قسم كبير كان بحري وقسم لبناني
قسم الشوي
فيه عدة انواع من السمك والربيان متبل وجاهز للشوي مباشرة جدامك
شي لذيييذ 🙂
بيتزا
جانب الاطباق الرئيسية
فيه الستيكات والدجاج والعيش والربيان والسالمون
ونوعين شوربة
قسم الباستا يجهزها جدامك باختيارك
وختمناها بالحلويات
فندق الريجنسي وزعوا علينا ارقام وقت دخولنا
وسووا سحب في نهاية العشاء
وكان في عندهم عده هدايا مقدمة من الفندق مثل اقامة في اكبر جناح عندهم وغيره من الهدايا
والحمدلله طلع رقمنا وربحنا وحدة من الجوائز افطار في رمضان 🙂
فندق الريجنسي يقدم بوفيه افطار في رمضان قيمتة ١٦ دينار للشخص
ويقدم قائمة سحور قيمتها ٩ دنانير للشخص
في مطعم طريق الحرير
وفندق الريجنسي عنده مسابقة في رمضان
اذا تفطرت عندهم احتفظ بفاتورتك لازم يكون المبلغ فوق ال٥٠ دينار
وحط لايك على حسابهم الفيس بوك هنا
وارسل رسالة لهم عالفيس بوك برقم فاتورتك ورقم تلفونك وتدخل السحب
ممكن تفوز بوحده من ٣ جوائز قيمة مثل الاقامة في احد الاجنحه المميزه
فندق الريجنسي موجودين في البدع عالبحر
شكرا فندق ريجنسي عالهدية والدعوة
وشكرا تراكس عالدعوة
في تجربتنا للاقامة في فندق الشانغريلا مسقط
حجزنا رحلة الدلافين متوفره في فندق البندر
متوفره الصبح على فترتين
٨:٣٠ والثانية ١٠:٣٠ صباحا
والقارب كبير يكفي ١٨ شخص
حجزنا الرحلة بالتلفون كلمنا فندق البندر وسهالات ارسلوا لنا سياره لفندقنا الواحة
وعلى طول ودتنا المارينا اللي يتواجد فيه قارب الرحلة
البحر نظيييف ويشوووق
انطلقنا بسرعة متوسطة مع ان رطوبة
لكن مع سرعه القارب الهوا صار بارد ومنعش
سائق القارب اسمة يوسف
محترم جدا وخدوم وكان القارب على حظنا فاضي محد معانا
فأخذنا راحتنا بالتنقل بين الكراسي
وموفرين لنا ثلاجة فيها ماي وعصير ومشروبات غازية مجانا
اليهال راح يحبون الرحلة وايد
ومدة الرحلة ساعتين
دخلنا داخل البحر حوالي نص ساعة لان الدلافين داخل خليج عمان وبعاد
ويوقعونكم على ورقه ان ممكن ماتلاقون اي دلافين او ممكن ماتشوفون ولا دلفين على حظكم
ولقينا قطيييع من الدلافين السود
شكلهم عجيييب حوالي ٣٠ دلفين مع بعض
ومع الدلافين حوالي ٥ قوارب صيد سمك صغيره تلحقهم كل مكان
طلعوا انهم صيادين سمك التونا وان التونا تكون مع قطيع الدلافين
وهذي بعض اللقطات للدلافين في خليج عمان
وبعد تقريبا ساعة من ملاحقة الدلافين وتصويرها
رجعنا للفندق عن طريق المرور بهذا التجويف الجميل
وهذا فندق الحصن التابع للشانغريلا مواجهه للبحر
وهذا البيت الازرق من زجاج لصاحب فندق شانغريلا
الله يبارك له خوش موقع
رحلة الدلافين تكلف حوالي ١٤ دينار للشخص
و١١ دينار كويتي للاطفال
والحجز من فندق البندر قسم الرحلات
كانت رحلة ممتعه وحلوه واستمتعنا بالهوا الحلو والدلافين
تقريري عن فندق الشانغريلا مسقط
Shangri-La’s Barr Al Jissah Resort and Spa – Muscat
الاسبوع اللي طاف زرنا منتجع الشانغريلا بر الجصة في مسقط
وسكننا في فندق الواحة المخصص للعائلات اللي معاهم اطفال صغار
هذا تقريري الاول بالرابط عن غرفتنا الديلوكس وعشاء الروم سيرفس
وبهذا التقرير بكتب عن مرافقهم السياحية وشنو تلاقونه داخل المنتجع
اولا عندهم سبا وصاله رياضة وقرية التراث العمانية فيها تسوق بسيط وركن لالعاب الاطفال
بخصص لها موضوع خاص
الفندق موجود على شاطي خليج عمان خلف منطقه جبلية
والطرقات مثل ما تشوفون بالصوره كلها بين جبال ضخمة
الطريق سبب لي غثيان لان مو متعوده على الطرق الجبلية
وماشاء الله سواق التكاسي متعودين عالمنطقه فيدوسون سرعه عالية بالسياره على حافه الجبال
وانا قلبي يوقف من الخرعة
كانت اسوء شي بالرحلة بالنسبه لي طريق الجبل
فندق الواحة بالشانغريلا فيه ٣ حمامات سباحة
٢ للكبار وواحد للاطفال عمقه بسيط
وممكن تروحون حمامات سباحة فندق البندر المجاور مشي عالاقدام
لكن الفندق الحصن ممنوع الدخول اليه الا لسكان الحصن لان ممنوع دخول اي طفل فيه
لتوفير الهدوء والاستجمام للنزلاء 🙂
حمام سباحة الاطفال
عندهم النهر الصناعي على طول فندق الواحة
رشاشات للماء للاطفال
ملعب كرة قدم للاطفال
ميزة حلوه بالفندق مالقيتها بمنتجعات دبي مثل الجميرا او اتلانتس
هي توزيع المناشف المثلجة البااارده عالناس
تبرد علينا
وتوزيع ثلاجة صغيره فيها ثلج و٤ بطول ماي صحة لفترة السباحة عالبحر
وتوزيع الرقي او البطيخ على النزلاء
الصراحة حبينا هالموظف برد علينا وبشووووش
عالشاطئ موفرين العاب الرمل البلاستيكية للاطفال مجانا
الشاطئ كبير ونظيف
والشاطئ واحد بين الفندقين الواحة والبندر
اما الحصن لهم شاطئ خاص لهم
ويوفرون الرياضة البحرية مثل البنانا بوت والدونت والجت سكي وغيرها
هذا فندق الحصن بالويهه
وهذي الكراسي بقسم البندر
حلوة لمحبي الشطرنج
عندهم بعد ركوب الجمال ساعتين حزه العصر يوميا
Assira وهذا كافيه اسمه اسيرا
صوب حمام سباحة الاطفال
يقدم العصاير والسندويشات
جربنا البرغر كانت ماصخة وعادية
لازم شكن ناغتس للاطفال
هذي الشغلات المتوفره في فندق الواحة
وفي عندهم نادي للاطفال يستقبلهم بدون الاهالي بس ماصورته ومادخلنا له
والفندق يوفر بعد رحلات غوص وسنوركلنغ
ورحلات الدلافين
بتقريري القادم بحط لكم رحلتنا لمشاهده الدلافين في خليج عمان
وتجربتنا لبوفية الاكل البحري في مطعم السامبا
هذا التقرير الاول عن الفندق هنا
