واحنا نتمشى في سوهو صدفة مرينا على مطعم شكن ساور
قريت المنيو وشفت التقييم له ممتاز ودخلنا نجربه
المطعم يقدم الدياي بكل اشكاله
اخترت الدياي المقلي الكلاسيك مع اصابع الدياي المخليه وسلطه الباذنجان
يقدمون مع الدياي قطع الرقي المخلله شي جديد علي لكن طلع لذيذ
الدياي فيه قرمشه قوية لدرجه ان الطبقه الخارجيه يابسه بزياده تعور الفم وانت تاكله
لكن بشكل عام مطعم لذيذ للدجاج المقلي
اضغط عالصوره لتكبيرها
شكن ساور لندن سوهو
كافيه فوا فوا في لندن
مختص بالبانكيك الياباني
عنده يمكن ٣ او ٤ انواع واحد بالفواكة وواحد ساده وواحد بالكاكاو وبالماتشا
دايما اشوف البانكيك الياباني بالانستغرام وخاطري اجربه الصراحه
طلعنا موقع الكافيه في الغوغل طلع في مجمع برنزويك
البانكيك واااايد خفيف ماتحس بالشبع منه
لكن الطعم خيب توقعاتي طعم البيض فيه واضح جدا وشخصيا ماحب طعم البيض يبين بالبانكيك
مادري هل كل البانكيك الياباني فيه طعم البيض؟ او بس هذا الكافيه
والناس اذواق يمكن يعجبكم وتحبونه
حديقة ذا برنس
مثل ماتشوفون بالصور فيها طاولات كبيره لقروبات اشخاص كبيره وداخلها حديقة كبيره
العادة اييون لها مجموعات كبيره وتحجز لها طاوله كامله
فيها ٤ مطاعم اكل سريعه
منهم مطعم باتي اند بن للبرغر الشهير في لندن
ومطعم كوك فايتر للدجاج المقلي وايد لذيذ صمون الدياي المقلي
وفي مطعم اسيوي طلبنه منه كلاماري كان عادي وثاني اسباني
اذا حابين تاكلون فيه يفضل تروحون الظهر قبل المغرب وقبل الزحمه تاكلون على راحتكم وتمشون
ما انصح فيه بعد فتره المغرب او بعطل نهاية الاسبوع
مطعم ابادانا من المطاعم الفارسية في لندن
جربته في سفرتي السابقه ورديت زرته مره ثانيه
لان قريب من الفندق اللي سكنت فيه
يقدم الكباب مع الدجاج المشوي بالزعفران مع العيش
ومرقه البامية باللحم كانت جيدة
وخبز التنور عندهم وايد لذيذ وخفيف
واللبن لازم تطلبونه وايد منعش ولذيذ
المنظر والجو وايد حلو للمطعم خاصه اذا فتحوا بيبانهم الزجاجيه
apadana kensington high street
ماركت ساوث بانك للاكل في لندن
موجود خلف لندن آي او عين لندن
فيه عدة اكشاك او بوثات للاكل
وفيه كل اللي يخطر ببالك من اكل عربي او هندي او اثيوبي او بيتزا او حلويات وفواكه وغيرها
خوش ماركت صغير وهادي وفيه اكل لذيذ
هذي صور للماركت اصغط عالصوره لتكبر
هذا فيديو بعد للماركت
من المطاعم اللي جربناها في لندن
مطعم ابادانا الايراني
بحثت بالنت عن مطعم تقييمه عالي ولقيت هذا
في لندن منطقة كينغستون
جربنا طبق الكباب كوبيده وطلبنا حبة اكسترا
كان وايد لذيذ
مرقة اللحم بالباذنجان وايد لذيذه ونااااطعة ماتتطوف
حكوكة حق التغمس 🙂
واخر شي استكانه جاي تنزل فيها الدهن 🙂
كانت تجربه لذيذة وممكن نكررها بالمستقبل والاسعار معقولة
سبيتال فيلد ماركت واحد من اقدم الاسواق في لندن
متوزع فيه مطاعم ومحلات وفي كشكات اكل
اقرب محطه اندرغراند لها اهي محطه الدغيت
السوق يفتح يوميا من الصبح لي ٥ المغرب
اضغط عالصوره لمشاهدة اوضح
هذي فيديوات للماركت
شاحنه الاورانج بافلو مشهوره في لندن انهم يقدمون الذ اجنحة دياي عالطريقه الامريكيه
مع الصلصه الحارة بدرجات وسط وحاره وحاره بزياده
مع البطاط الحلزوني او البطاط العادي
حلو حق سناك وانت ماشي
مطعم ذا بريكفاست كلوب مشهور للريوق في لندن
اعتقد يعتبر من اشهر مطاعم الريوق اهناك
زرناه عال٩ الصبح يوم العطله وانصدمنا بالطاااابور اللي بره
انا شخصيا ما انتظر حق مطعم اكثر من نص ساعه
لكن قلت لازم اجربه لان صدف اكثر من سفره نوصل له ويطلع زحمه ونمشي
هل المره قلت ننطر طولت النطره ساعه وربع بالبرد 😦
ودك بنص النطره تمشي وبعدين تتحسف عالوقت اللي نطرته وتقنع نفسك ان يلا اصبر شوي
كل اللي ينتظرون كانوا سياح قارين عنه ببرامج الاكل مثلنا
كابتشينو
قعدونا على طاوله وحده مشاركة مع ناس ثانيين رضينا فيها بعد نطره ساعه
طلبت البيض البندكت مع الافوكادو بدون لحم
كان الطبق حلو لكن مايستحق كل هالنطره
مطاعم الكويت تطقه ١٠ صفر
وهذا الريوق الانجليزي بانكيك وبيض مقلي ومشروم ونقانق من الخضار
عادي
مع كوب كابتشينو
هل يسوا النطره؟
لا طبعا
ممكن اكرر الزياره له اذا مافي انتظار
ويقدم اطباق البيض لكن نفسها متوفره بمطاعمنا بالكويت
المدينة الصينيه في لندن
موجوده في سوهو فيها مطاعم صينية وسوبرماركت كله شغل الصينيين
ومخابز ومحلات اعشاب صينية
حلو الواحد يتمشى فيها ممكن تاخذون من مخابزها كيك واللي حاب يتعشى فيها صيني
محل بيك يبيعون ايس كريم الشاي الاخضر ببسكوت او كيك على شكل تاياكي او سمجه
تلاقونه باخر المدينه بجانب ام اند امز وورلد
Fraser Suites Queens gate London
فنادق فريزر سويتس عالميه وعندهم فروع في اكثر من ٢٤ دوله بالعالم
هذي الفنادق ميزتها انها شقق فندقيه عندهم الاستوديو والشقه بغرفه او غرفتين
وفيهم خدمة فندقيه يعني تنظيف يومي للغرفة
جربنا الفندق فرع كوينز غيت في لندن
اللوبي صغير وايد
اخذنا استوديو حق شخصين وعطونا استوديو اللي سقفه عااالي وااايد شرح وعالشارع
الغرفه وااايد واسعه اكبر من الغرف اللي متعودين عليها بفنادق لندن
والسقف العالي الصراحة كان ميزه حلوة
ركن المطبخ فيه ثلاجة ومايكرويف وجوله وكامل معدات الطبخ
للاسف الفراش كان مو مريح ١٠٠٪ كان فيه خفقه بالماتريس
الشامبو وايد حلوة ريحته ماركة لوكسيتان
داخل الغرفه حاطين لنا هالتلفون نظام اندرويد
فيه انترنت ومكالمات مجانيه ودليل سياحي خدمة لزباين الفندق
تاخذ التلفون معاك لما تطلع وترده مكانه وقت الشيك اوت
اول مره يصادفني فندق يوفر لسكانه تلفون بخط ومكالمات وانترنت مجاني
صج ان ما استخدمناه لان عندنا خطوطنا الخاصه بس هم ميزه حلوة
وهذا المنظر من غرفتنا
الفندق ميزته ان الغرف واسعه وفيها مطبخ وقريب من محطه الاندرغراوند غلوستير
في تحته تيسكو وجمعيه ويتروز الكبيره وشارع مطاعم تحته
من المطاعم بايرون برغر وكنتاكي وبرغر كنع وناندوز واسك ايتاليان وكافيه بول وبريت وغيره
وموجوده صيدلية بوتس
مكان الفندق حلو ان فيه خدمات تحته لكن بعيد عن شارع الاكسفورد اللي يحبونه العرب
يبيله ١٥ دقيقه بالاندرغراوند لي شارع اكسفورد
مطعم بليكر ستريت هو مطعم لندني عنده ٣ فروع في لندن
ويقدم البرغر الامريكي واسمه على شارع بليكر المشهور في نيويورك
جربنا البرغر عنده في فرع سبيتال فيلد ماركت في لندن
البرغر طلبتها ويل دن كانت واايد لذيذه وخفيفه والصمونه البن كانت ترفه بعد
والبطاط مكس سويت وعادي
وجذي شكل الفرع والطاولات بالسوق المفتوح كان وااايد بارد الجو ماقدرنا نقعد كلينا بسرعه ومشينا
اللي يروح لندن ويبي برغر حلو ممكن يجرب بليكر ستريت برغر
مطعم ماكي من اول المطاعم اليابانيه اللي انشهرت بالكويت
وقدموا لنا اطباق السوشي بنكهه تناسب ذوقنا الخليجي صار لهم اكثر من ١٠ سنين
وحاليا عندهم فرع في لندن
كانت لي زياره ل لندن قبل فتره بسيطه وكلمنا اصدقائنا عائلة ماكي ان لازم في فترة زيارتي اجرب شغلكم مايصير ارد الكويت وماجرب فرعهم في لندن
الى الان ما افتحوا المطعم لكن ماقصروا قدموا لنا من اطباقهم المشهوره لكن بشكل يختلف عن فروعهم بالكويت
المطعم في لندن في منطقه سوهو وبالتحديد في شارع دين
الشارع متروس مطاعم وحلو للتمشي
ومطعم ماكي كان طابقين قعدنا بالطابق العلوي
كالعادة الديكور راقي ونفس اجواء ماكي والخدمة ممتازه مع ان لي الحين ما افتحوا
Spicy Edamame
الادمامي السبايسي طبق موفق نبدا فيه
Crispy Salad
سلطة الكرسبي نفس اللي بفرع الكويت لكن بشكل ثاني وطعم ألذ
Fried Oysters
محار مقلي كان حامض ولذيذ
Filo Prawns Tempura
ربيان مقلي كرنشي وخفيف
Chicken Plum Sauce
دياي بصلصه سويت واايد ترف وجوسي كان جدا لذيذ
Kaifii Maki
وبما ان احنا عندهم الشيف طلع لنا كيفي ماكي اللي سووه لنا باسمنا من قبل ٣ سنوات
اللي ماجربه لازم يجرب كيفي ماكي تلاقونه بكل الفروع 🙂
وهذا رابط عن الطبق كيفي ماكي
Essa Maki
وهذا عيسى ماكي المشهور لكن بالشكل اللندني 🙂
Kappa Zume
Tartufo Yaki Udon
اودون اهو نوع متين من النودلز مع الفقع والمشروم
Tiramisu
وختمناها بحلو التيراميسو الخفييف
الصراحة كانت زياره ممتعه ولذيذه
ومكان ماكي وايد حلو في سوهو اصلا لندن بكبرها حلوة وكلشي فيها حلو
اشكر ماكي عالضيافه واتوقع لهم نجاح قوي في فرعهم بلندن
راح يفتح في شهر فبراير رسمي يعني احتمال عالاسبوع الياي
ممكن تتابعون حسابهم الانستغرام وتشوفون اذا افتحوا ويستقبلون الزباين
اذا رحتوا لندن انصحكم بغدا او عشا في ماكي اهناك 🙂
اشتهينا في لندن اكل تايلندي وبحثنا في التريب ادفايزور عن مطاعم تايلنديه زينه قريبه علينا
وكان مطعم باتارا تقييمه وايد حلو
عنده ٣ فروع في لندن جربنا فرع سوهو
كان المطعم زحمه وانتظرنا ١٠ دقايق لطاوله فاضية لان يحتاجون حجز مسبق
المطعم راقي وتقديم الاكل مميز والاهم الطعم وايد لذيذ
Tom Yum Goong
شوربه التوم يام مع الربيان عجيييبه
Yum Nua Yang
سلطة اللحم المشوي مع الليمون دايما نطلبها بكل مطعم تايلندي وايد لذيذه
Satay Trio
اسياخ الساتاي ٢ لحم و٢ دياي و ٢ ربيان مع صلصه الفول السوداني
كان وايد حلو الطبق
Pad Thai
نودلز الباد تاي مع الربيان كان الطبق لذييذ والخضار اللي فيه فريش والربيان بدون زفره
المطعم بشكل عام كانت التجربه فيه مميزه
التقديم والخدمة والطعم والجودة كلها ممتازه
والسعر غالي شوي
مطعم باتارا في لهم فرع في شارع الريجينت بجانب محل ابل ومقابل محل هامليز للالعاب
والثاني في سوهو
والثالث في نايتسبريدج
وهذا موقعهم لحجز الطاوله وقائمة الاكل بالاسعار
زرت محل ام اند امز في لندن
المحل منتجاته كلها على شخصيات ام اند امز من اكسسوارات وملابس وقرطاسية واكواب وغيرها
المحل ضخم فيه حوالي ٤ طوابق وسرداب
زرناه بالليل عال١١ وكان زززحمه
اخذنا تذكارات وشغلات لليهال استانسوا عليها
حبيت اللون الاسود اول مره اشوفه اسمه
Fireworks Mix
ونوع جديد بالدارك شوكليت
الكاكاو الاسود
حبيت هذا القسم تكتب على الكاكاو اسمك او تحط صورتك
والجهاز يطبعها عليه
اول شي تدفع للكاشير يعطونك الكود وبعدها بالكمبيوتر تكتب ٤ اسامي ممكن تنطبع
او ٨ اسامي اسمين بكل حبه
او صوره تكون على حبه كامله
عقب تختار لون الكاكاو اخترت الالوان اللي ابيها وبعدها نحطه بالجهاز ويطبع لنا عليه الاسم
تجربه حلوه واليهال اسستانسوا على اساميهم
عالم ام اند امز في لندن موجود بين ليستر سكوير وبيكاديلي سيركس ممكن توقفون باي محطه من هالمحطين
وبجانبهم بعد السوق الصيني اذا حابين تتعشون بمطعم صيني
في زيارتي السابقة حق لندن
زرت ملعب الامارات لفريق ارسنال
الوصول للملعب سهل جدا رحت له عن طريق الاندرغراوند الى محطة ارسنال
وطريقة حجز الجوله داخل الملعب عن طريق موقعهم عالنت اذا انت حاب جولات مع لاعبين سابقين بقيمه ٤٠ باوند
لكن اذا حاب جولة مفردة بنفسك ويعطونك سماعة فيها تسجيل ب ٩ لغات ممكن تحجزها بنفس الوقت في الملعب بقيمة ٢٠ باوند للجولة والمتحف
وهذي لقطات للملعب
اطبع اسمك على التي شيرت بالتصميم اللي تحبه
جولة ممتعة في الملعب وداخل غرف تبديل اللاعبين
هذا رابط حجز التذاكر على موقع ارسينال
جولتي في ملعب الكامب نو البرشلوني
صوري من مباراة الكلاسيكو برشلونه وريال مدريد في ملعب الكامب نو
مطعم ذا داينر عنده سلسله مطاعم في مختلف انحاء لندن
يقدم الاكل الامريكي
ربيان مقلي
طبقه الطحين متينه وايد ضيع طعم الربيان
مانصح فيه
شيز برغر حجمها كبير
الخبزه كانت يابسه واللحم كان ناشف
البرغر كانت جدا عاديه
جربت ذا داينر الفرع اللي بجانب محطة غلوستر رود في لندن
المطعم جدا عادي ما انصح فيه ممكن اذا كان مافي بديل بجانبه ممكن تقزرون فيه
يمدحون مينو الريوق وايد فيه بانكيك ووافل وبيض شغل امريكي
The Diner near Gloucester road
مطعم حافظ من المطاعم اللي جربتها في لندن
مطعم ايراني
قريت تقاييم ممتازه كثيره في النت عنه قبل تجربته
زرناه في الويكند وكانت غلطتنا ان ماحجزنا قبل زيارتنا له
وللاسف كانت كل الطاولات محجوزه
فطلبنا منهم اذا في مجال نقعد بالطاولات الخارجيه مع ان الجو بارد بس وصلنا المطعم وماودنا نمشي
وعلى طول جهزوا الطاوله
طلبت ان الطبق يكون نصه كباب ونصه قطع دجاج مشويه
الاكل كان وااايد لذيذ وفريش
كباب كوبيده جدا ممتاز وحجم الكبابه كبير
مرقه باميه كانت مو مضبوطه
مانصح فيها
داخل المطعم
الديكورات حلوه والمكان صغير شوي
قدموا لنا الشاي والحلو كضيافه منهم مجاني
مطعم حافظ انصح فيه
كانت الضيافه والخدمة والقعده والاطباق ممتازه
افضل بكثير من مطعم آلونك اللي جربته في لندن
مطعم حافظ موجود بجانب محطه كوينزوي ممكن تبحثون عنه بالغوغل واذا كان ويكند يفضل تحجزون طاوله
في سفرتي السابقه ل لندن جربنا عدة مطاعم مختلفه
@kaifiiblog وجربنا هذا المطعم بناء على توصيه احد المتابعين بالانستغرام
المطعم يقدم الاكل الايراني اسمه آلونك
موجود قرب محطه بيزواتر
المطعم ديكوراته بسيطه وسعر الاكل فيه معقول
متعودين في المطاعم يقدمون لنا الخبز الايراني مجاني مع الوجبه
لكن في هذا المطعم كل شي لازم تطلبه مافي شي مجاني ولا طبق ضيافة
طلبنا خبزه وحده كانت جيدة
ماعون كباب كوبيدة الطلب العادي فيه سيخين كباب
فطلبنا سيخ كباب زيادة
كان الطبق وايد لذيذ
طلبت طبق اليوم كان اسمه زرشت بولو
الصراحه ماعندي فكره بالاكل الايراني غير الكباب قلت اجرب شنو عندهم شي مختلف
وطلع طبق اليوم للاسف اختيار غير موفق
نص دجاجه مسلوقه مثل اللي نسويها للتشريبه مع عيش ابيض بالزرشت
كان الطبق جدا عادي مانصح فيه
اللبن عندهم حجمين الصغير مثل اللي بالصوره يشيل كوبين وفي اكبر
ما انصح باللبن كان حامض بزياده
مطعم آلونك موجود في لندن بجانب محطة بايز واتر
المطعم بسيط قعدته مو كشخه وطلبوا الاطباق المعتاده مثل الكباب لذيذ
لكن جربت مطعم ايراني اخر بلندن وايد افضل منه راح اكتب عنه قريب
Alounak Persian Cuisine near Bayswater Underground
رولات اللوبستر صاروا هبتي اليديدة
اي مكان يبيع رولات لوبستر لازم اجربها واحاول ابحث عن مطاعم تقدمهم
الحلو بالصمونه طبعا البريوشه اللي محمشه بالزبده وداخلها قطع اللوبستر مع المايونيز على حسب نكهه كل مطعم
بس زياده الصلصات والمايونيز تضيع طعم اللوبستر
جربنا رولات اللوبستر في مطعم سماك ديلي
عندهم ٤ انواع لوبستر رول وحده منهم فيها خنزير فحطوا بالكم
اختاروا كاليفورنيا رول اهي اللي تناسب ذوقنا الخليجي اكثر شي
فيها لوبستر ومايونيز الافوكادو وخيار وطماط وايد لذيييذه
وعندهم اللوبستر الكامل البارد مع الليمون
وايد حلو ولذيذ ومافيه اي زفره
واصابع الكوسا المقليه وااايد لذيذة
لاتطلبون شوربتهم الشاودر لان فيها كحول
المكان بسيط مائل لمطاعم الفاست فود
الطلب من الكاونتر واخدم نفسك بنفسك
ركن للسلطات والفاكهه
سلطة اللوبستر والكسكس ماجربتها
الفرع اللي جربناه موجود في شارع اكسفورد بجانب محطه بوند ستريت
رولات اللوبستر واللوبستر الكامل وايد حلوين لازم تجربونهم اذا زرتوا لندن
انصح فيه
Smack Lobster Roll Deli
