Archive | Spain RSS feed for this section

فطاير على اعلام كأس العالم من منقوشة

12 Jun

DSC_0769manqoushe

مع بداية كاس العالم

وصلتني نقصة من منقوشة

مشروحات او فطاير ضعيفة على علم الافرقة اللي اشجعها شخصيا

اسبانيا وهولندا

DSC_0779manqoushe

مشروحة اسبانيا او الماتادور

لحم مفروم حار سبايسي عالاطراف

ودجاج مسحب بخلطة ثوم وزعفران بالنص

DSC_0785manqoushe

DSC_0793manqoushe

DSC_0827manqoushe

مشروحة هولندا – الطاحونة

قشطة مع عسل  عالاطراف وبالنص جبن

حلينا فيها

DSC_0825manqoushe

DSC_0851manqoushe

كان عشاء حلو مع بداية كأس العالم

وعندهم مشروحات ل ١١ فريق اخر

وهذي اشكالهم

Screen Shot 2014-06-12 at 11.18.09 PM

ومسوين مسابقات على حسابهم الانستغرام عن كاس العالم وفيها جوائز

@manousheq8

تقدرون تطلبونهم منهم

على الرقم

1838303

www.manoushe.com.kw

DSC_0806manqoushe

كل الشكر عالنقصة

Solo Churros هدية السنة الجديدة من سولو شوروس

1 Jan

Solo Churros

محل سولو شوروس المتخصص بالحلو الاسباني

ارسل لنا هدية بمناسبة راس السنة الجديدة ٢٠١٣

DSC_0003solo churros

DSC_0005solo churros

DSC_0008solo churros

علبة لذيذه من الشوروس الاسباني بنكهاتهم الفريدة

DSC_0012solo churros

وعلاقة مفاتيح او اكسسوارات على شكل اسبانية

شكلها يشووووق حبيتها

حطيتها عند الباب للمفاتيح

DSC_0017solo churros

DSC_0020solo churros

lotus white chocolate

شوروس بنكهة الكاكاو الابيض ببسكوت اللوتس

حبيتها وايد اكثر من النوع الثاني

DSC_0022solo churros

lotus milk chocolate

شوروس بنكهة الكاكاو بالحليب مع بسكوت لوتس

لاتنسون تسخنونه بالمايكرويف ١٠ ثواني لنتيجة لذيذه 🙂

مشكوره اختي نور عالهدية الحلوة

وكل عام وانتي بخير وصحة وعافية

سولو شوروس عندهم فرع في برج جاسم

22960097

موضوعي السابق عنهم 

Mercat de la Boqueria زعفران اسباني من برشلونه

17 Nov

Mercat de la Boqueria

في زيارتي السابقه لبرشلونه

وصوني على زعفران اسباني

بحث عنه ولقيت سوق كبير في شارع الرامبلا

سوق لابوكيريا  يعتبر واحد من اكبر الاسواق في برشلونه

فيه كشكات متعدده تبيع الخضار والفاكهه واللحوم والبهارات والزعفران والمكسرات وغيرها

سوق شعبي حلو للتمشي والطماشه

ولقيت عندهم زعفران اسباني اصلي

بالنسبه للسعر اغلى من الزعفران الموجود بالكويت

Tibidabo مدينه الملاهي تيبيدابو في برشلونه

28 Oct

مدينه الملاهي تيبيدابو في برشلونه اسبانيا

تعتبر وحده من اقدم مدن الملاهي بالعالم

عمرها ١٠٠ سنه

هذي المدينه موجوده على جبل

وزرناها عن طريق الباص السياحي كانت وحده من محطاته

من هذي المحطه تروح عن طريق باص اخر الى اعلى التله ومنها تركب القطار الخاص بمدينه الملاهي

الى اعلى الجبل

اسعار تذكره القطار

هذي محطه القطار

تركب الدرج للصعود فيه

وهذا اهو القطار يوديك فوق للملاهي وكنيسه تيبيدابو

المنظر من القطار واهو صاعد لمدينه برشلونه

مدينه الملاهي عباره عن ٦ طوابق على الجبل

وكل طابق فيه مجموعه العاب مختلفه لجميع الاعمار

كراسي على شكل لعبه الدومينو والشطرنج

هذي وحده من الالعاب تمر على الجبل المنظر يخرع من تحت

الطابق اللي تحتنا فيه مجموعه العاب ثانيه

منظر مدينه برشلونه من على جبل تيبيدابو

ماصورت صور وايد للملاهي لان انشغلنا باللعب

سعر التذكره ٢٨ يورو للكبار و و١٠ يورو للاطفال

وتفتح في نهايه الاسبوع سبت واحد فقط ما عدا المناسبات

من ١٢ الظهر الى ٩ مساءا

الاوقات تتغير مع الموسم لذلك تقدرون تتأكدون من وقت فتحها من موقعهم الاساسي

مدينه الملاهي حلوه بس تناسب الاطفال اكثر

يعني مو واو وايد عاديه

موقعهم

انتظروا تقريري عن دزني لاند باريس هذي اللي صج اسمها مدينه ملاهي 🙂

Aquarium Barcelona زيارتي لاكواريوم برشلونه

27 Oct

L’Aquàrium de Barcelona

في زيارتي السابقه لبرشلونه زرنا الاكواريوم

Port Vell موجود في ميناء فييل

هذا الميناء موجود بنهايه شارع لارمبلا وساحه كاتالونيا الشهيره

هذا الميناء وصلنا له عن طريق الباص السياحي كان وحده من محطاته

تقريري السابق عن الباص السياحي

سعر التذكره ١٨.٥ يورو لكن سوولنا خصم من كوبونات الباص السياحي

داخل الاكواريوم بجانب احواض السمج في كافتيريا ومحل لبيع التذكارات

ومنطقه لالعاب الاطفال

وهذي بعض الصور للاكواريوم

نيمووووو

الحلو بالاكواريوم هذا الممر يمشي ويدخلنا الى نفق داخل حوض السمج

مثل طريقه اكواريوم دبي مول بس اطول

شكله مجرررم 😦

مار من فوقنا

وهذي السمجه شكلها غريب سبحان الله ضخمه اكبر مني وذيلها غريب

هذيل شكلهم عجيييب يطلعون ليتات حمر وزرق

جانب من العاب الاستكشاف للاطفال

اكواريوم برشلونه كان مكان جميل للزياره

لكن اللي رايح اكواريوم اتلانتس بدبي او اي اكواريوم ثاني راح يلاقي نفس الشي في برشلونه

يعني ماكو شي جديد فقط متعه للاطفال

يعني اللي بروح برشلونه ووقته ضيق مايحتاج يروح هذا الاكواريوم حسيته عادي ماكو شي جديد

زيارتي السابقه لاكواريوم اتلانتس دبي 

موقع اكواريوم برشلونه الرسمي

Camp Nou Barcelona جولتي في ملعب الكامب نو البرشلوني

24 Oct

في زيارتي لبرشلونه حضرت مباراة برشلونة و ريال مدريد

  و في نفس الشباك الي تحجز منه تذاكر المباراة ممكن تحجز منه حق تذكرة التجول داخل الملعب اللي يسمونها التوور

هذا شباك التذاكر

هذي طاوله طويله فيها صور و معلومات عن تاريخ النادي

مجموعه من الكؤوس اللي حصل عليها النادي

مجموعه ثانيه من الكؤوس و معاهم الحذاء الذهبي

كؤوس موسم السداسية

كؤوس دوري الأبطال الاربعه

موجوده الكرات الذهبية الثلاثه اللي حصل عليهم ميسي

احذيتهم القديمة

كره قديمة موقع عليها من الاعبين

كرة ذهبيه و حذاء قديم

  معلومات عن مارادونا

تي شيرت مارادونا موقع عليه مارادونا

المعلومات عن تاريخ النادي من البداية الى الموسم الحالي

تي شيرت ميسي طبعا و كره موقع عليها

صور مدراء النادي من اول واحد الى المدير الحالي رووسل

شعار النادي على المدرجات – اكثر من مجرد نادي

صوره من اعلى المدرجات

الاهتمام بعشب الملعب

صوره من عند الكورنر

كراسي لاعبين الاحتياط

صور المدرجات و فوق كباين خاصه للمعلقين

ممر الاعبين الى ارضية الملعب

غرفة تبديل ملابس الاعبين

فيها جيكوزي اكيد مدلعينهم

كأس دوري الأبطال حق اللي يبي يصور معاه و تشتري الصوره اذا عاجبتك الصوره

اللي يروح الملعب لازم تدخلون التوور لأنها تجربه حلوه

By Ali

La Roca Village Outlet زيارتي لأوتليت لاروكا فيليج في اسبانيا ومعلومات بالتفصيل

22 Oct

في زيارتي السابقه لاسبانيا وبالتحديد برشلونه

قلت لازم اروح الاوتليت في اسبانيا

للي ماعنده فكره عن الاوتليت هو مكان يبيع الماركات باسعار مخفضه

من ملابس وساعات واكسسوارات وغيرها وتكون البضاعه من مواسم سابقه

الطريق الى الاوتليت من برشلونه بالتحديد من ساحه كاتلونيا تحتاج ٤٠ الى ٥٠ دقيقه بالسياره

بحثت عن افضل وارخص طريقه للوصول

وهو عن طريق الباص الخاص بالاوتليت نفسه

باص اسود ومكتوب عليه لاروكا فيليج اوتليت

تقدرون تحجزون التذكره من الانترنت من موقعهم

او من ساحه كاتلونيا في كشكات خاصه للسياحه

احنا اخذناها من الكشك الموجود بساحه كتالونيا سعر التذكره ١٢ يورو روحه ورده

ومكان الباص موجود بقرب الساحه مشي ٥ او ١٠ دقايق

ويطلع ٥ مرات باليوم والعكس

وصلنا الاوتليت بعد ٤٠ دقيقه

وداخل الباص كان في ايباد خاص للباص تسجل فيه معلوماتك للحصول على العضويه

VIP وبالمقابل يعطونك كتيب ال

فيه ٩ كوبونات خصم ١٠٪ على جميع المحلات في الاوتليت وممكن ٢٠٪ على حسب الموسم والعرض

الصراحه استفدت منهم واستخدمتهم في جميع مشترياتي

او تقدرون تسجلون عضويتكم في موقعهم للحصول على هذا الكتيب اذا وصلتوا الى الاوتليت

ولما تشترون من اي محل طلبوا التاكس فري كاش

(عشان بالمطار تاخذون التاكس فري (بدون ضرايب

اعتقد لازم المشتريات تكون اكثر من ٩٠ يورو عشان تاخذون التاكس فري

الاوتليت وااايد شرح ونظامه على شكل بيوت

وفيه اكثر من ١٠٠ محل من ماركات مختلفه

وهذي بعض اللقطات من الاوتليت مع ان ممنوع التصوير لكن قلت لازم اصور لحبايبي متابعين مدونه كيفي 🙂

قهاوي ومطاعم

محل فريق برشلونه الوحيد اللي ماعليه خصم والبضاعه اللي فيه جديده مالت هذا الموسم

مو عبالكم اوتليت وتخمون منه 🙂 نفس سعر باقي محلاتهم

وفي جانب للاطفال مفيد جدا تخلي عيالك وتتسوق على راحتك

كان يوم جميل ومتعب

اخذنا باص الساعه ١ من برشلونه ورجعنا في باص الساعه ٧ مساءا ما كفانا

يبيلكم وقت اكثر للتسوق عالاقل ٧ ساعات لان في محلات ما مداني احوس فيها

وهذي لسته للمحلات كلها الموجوده في الاوتليت

اضغطوا عالصوره لحجم اكبر واوضح

لقطات من الكلاسيكو برشلونه وريال مدريد من تصويري

20 Oct

في زيارتي الاخيره لبرشلونه

صادف موعد مباراة الكلاسيكو بين برشلونه وريال مدريد في ملعب الكامب نو

وصلت قبل الكلاسيكو بيومين

وماكنت شاري تذكره

فحصلت على تذكره بصعوبه مع ان مكان المقعد مو قريب من الملعب بس المهم ان حضرت الكلاسيكو

لانه حدث ما يتطوف

وصلت ملعب الكامب نو عن طريق الميترو من محطه كاتلونيا القريبه لفندقي المقابل لساحه كاتلونيا

الى محطه ماريا كريستينا الاقرب للنادي

وهذي بعص الصور اللي اخذها اثناء زيارتي للملعب

ناس تبيع كل ما يخص برشلونه من اعلام برشلونه وكاتلونيا وسكارفات وتيشيرتات وكبابيس

على طول الطريق المؤدي الى النادي

انتظار المشجعين عند بوابات النادي

علم وزعوه علينا عشان نرفعه بالدقيقه ١٧ و١٤ ثانيه في المباراه

لاستقلال مقاطعه كاتلونيا عن اسبانيا

البوابه اللي دخلت منها لمكان مقعدي بالملعب وفي اكثر من ١٠٠ بوابه موزعه على طول الملعب

هذا بالطريق الى مقاعد الملعب

ومريت على غرفه التعليق

ملعب الكامب نو

لاعبين برشلونه يسخنون قبل المباراة

لاعبين ريال مدريد

امتلاء الملعب مع قرب بدايه المباراة

قبل بدايه المباراة يعزف نشيد برشلونه ومعاه نرفع اللوحات اللي تكون موجوده عالكراسي

وكانت عباره عن علم كاتلونيا وبداخله كلمه برشا

كانت المباراة قويه

والنتيجه انتهت تعادل ٢-٢

جو الملعب مختلف تماما عن التلفزيون

الاجواء كانت حماسيه جدا وماتوصف

لازم كل واحد من مشجعين البرشا او الريال يجربه في يوم من الايام

By Ali 

افتتاح الفرع الثاني لمحل سولو شوروز للحلو الاسباني مع نكهات جديده

18 Oct

 تم افتتاح الفرع الثاني لمحل سولو شوروز للحلو الاسباني

في جمعيه الشاميه التعاونيه

ومنزلين نكهات حصريه لفرع جمعيه الشاميه هي نكهه السنيكرز و الاوريو

 و ال ام اند ام

تلفون : : 22960097

تقريري عن زيارتي السابقه لمحل سولو شوروز

رحلتي السياحيه في برشلونه على متن الباص السياحي

17 Oct

قبل اسبوع زرت اسبانيا بالتحديد مدينه برشلونه

وكنا ساكنين في فندق مطل على ساحه كاتالونيا الشهيره

وفي جانب من جوانب الساحه لقينا الباص السياحي اللي مكشوف من الاعلى

سألنا الباص ولا طريقه الشراء من الباص نفسه

سعر التذكره للشخص الواحد ليوم كامل من الصبح الى الليل ب ٢١ او ٢٣ يورو مو ذاكره بالضبط

وطريقة الباص انه في طريقين الشرقي والغربي  ويوقف في محطات

مده الرحله ساعه ونص للشرقي وساعتين للطريق الغربي

اخترنا الطريق الشرقي لانه يوقف في الاكواريوم ويوقف في مدينه الملاهي التيبيدابو

ويوقف في ١٤ محطه اخرى مثل الكنائس والشاطئ واماكن تاريخيه لهم

الباص في الطابق العلوي دايما يكون زحمه وماتلاقي مكان

لما تشتري منهم التذكره يعطونك كتيب فيه خصومات لمحلات ومطاعم

استخدمنا الخصم في تذاكر الاكواريوم

ويعطونك سماعات تقدر تركبها بجانب كرسيك لسماع نبذه عن الاماكن والمحطات اللي يمر فيها الباص

بعدة لغات وطبعا اللي نفهمها الانجليزي

Plaza Catalunya

اول محطه يطلع منها الباص السياحي هي ساحه كاتالونيا

احلى شي فيها الحمام اعدادهم كبيره

بس البايخ بالساحه الطرارين او الشحاتين اللي فيها

وطبعا الحجاب يعتبر مغناطيس لهم تلاقي الكل عندكم يطرون

Port Vell

ثاني محطه ميناء فييل فيه مجموعه سينمات وسينما ايماكس ثلاثيه الابعاد

وفيها الاكواريوم

L’Aquarium Barcelona

في هذي المحطه نزلنا الاكواريوم وقضينا فيه ساعتين راح اكتب عنه تقرير 🙂

Sagrada Família

من المحطات اللي نزلنا فيها عند الكنيسه الكاثوليكيه ساغرادا فاميليا

من تصميم المصمم الاسباني غاودي في عام ١٨٨٢

صورناها من بره ما دخلنا

المحطه رقم ١٤ هي مدينه الملاهي فوق الجبل تيبيدابو

Tibidabo

يوقف الباص عن محطه التيبيدابو وللذهاب لمدينه الملاهي احتجنا ناخذ باص اخر الى نص قمه الجبل

وبعدين خذنا القطار الى اعلى الجبل لمدينه الملاهي

راح اكتب عنها تقرير انتظروه 🙂

وهذا المنظر لبرشلونه من مدينه الملاهي

كنيسه تيبيدابو

وبجانب مدينه الملاهي توجد هذي الكنيسه وكان فيها عرس

الكل كاشخ ببدل رسميه كنا بنحضر معاهم بس كان لبسنا سبورت مايسمح 🙂 خفنا ننطرد

بعد ما خلصنا من مدينه الملاهي ردينا الى المحطه الاخيره وركبنا الباص السياحي الى نقطه البدايه

عند ساحه كاتالونيا

مع ان الجو كان مشمس وحار استمتعنا بالجوله

واتمنى تستفيدون من المعلومات في سفركم لبرشلونه

واللي عنده معلومات او اضافات يفيدنا

🙂

هذا موقع الباص السياحي لمعلومات اكثر 

صور من عدسه مدونه كيفي في محل ابل الرسمي في برشلونه

16 Oct

Apple Store in Barcelona

Passeig de Gracia street

محل ابل الرسمي في برشلونه تم افتتاحه من فتره بسيطه لا تتعدى الاشهر

ومكانه وااايد حلو ببرشلونه عند ساحه كاتالونيا الشهيره وبجانب شارع الرامبلا السياحي

يعني اللي يزور برشلونه اكيد راح يمر على محل ابل لان مكانه استراتيجي

المحل عباره عن طابقين

وهذي صور للطابق الارضي

وكله طاولات فيهم ايفون ٥ للتجربه

وامامهم ايباد يعرض مواصفات الايفون ٥ ويقارن بينه وبين الايفون ٤ اس

الطابق الاول

المحل ما شاء الله كبير وشرح

وهذي بعض الصور اللي قدرت التقطها

لان ممنوع التصوير داخل المحل !!

والدليل اليد بالصوره الاخيره يايه تهاجمني ممنووووع 🙂

كنت ناويه اخذ لي ايفون ٥ واييب للاهل اللي وصوني لكن للاسف ماعندهم ولا ايفون غير مقفول

بس المتوفر ايفون ٥ مع العقد من عندهم وطبعا مقفول مايفيدنا في الكويت

قلت اجرب حظي في فرع ابل في باريس داخل اللوفر

لكن باريس فرع اللوفر بعد مخلص من عندهم بس المتوفر المقفول !!

ما شاء الله مخلصين الايفونات في اوروبا

ماكو الا انطر لما تنزل الاسعار واخذ لي من الكويت 🙂 او اطلب اونلاين

غداي في شارع الرامبلا في برشلونه

15 Oct

في زيارتي لشارع الرامبلا في برشلونه

جربنا احد المطاعم الموجوده في الشارع

قلنا نجرب الاكل الاسباني بما ان احنا في برشلونه

وراح تلاحظون جميع المطاعم الموجوده بالشارع تقدم نفس الاكل

عباره عن مقبلات وطبق رئيسي اسباني مثل الباييلا وبيتزا وممكن ستيكات

Fried Calamari

من مقبلاتهم او الاسبان يسمونه التاباس

كلاماري مقلي كان لذيذ

Pizza Margarita

بيتزا مارغريتا

كانت حلوه البيتزا

Seafood Fideua

هذا طبق اسباني تقليدي يقدمونه في مقله او طاسه كبيره فيها ايادي عالجنب

عباره عن نودلز مع اكل بحري وخضار

وعندهم نوع ثاني يقدم مع رز او عيش يسمونه الباييلا

كان طعمه عادي وفيه شويه زفره

هل حبيت الاكل الاسباني؟؟

لا

كان عادي وافضل الامريكي والصيني والهندي عليه

وخدمه المطعم كانت سيئه كلهم نفسيه !!

طلعت الفاتوره  ٥٠ يورو

La Rambla تقريري عن شارع الرامبلا السياحي في برشلونه

15 Oct

في الاسبوع الماضي زرت اسبانيا

وسكنت في منطقه برشلونه

منها سياحه ومنها نحضر مباراة الكلاسيكو بين برشلونه وريال مدريد

سكنا في فندق بجانب شارع الرامبلا السياحي

La Rambla Street

شارع الرامبلا هو عباره عن شارع طويل وعلى الجانبين كله محلات موزعه

منها القهاوي والمطاعم والرساميين والكشكات اللي تبيع الاكسسوارات والتذكارات وغيرها

يبدأ الشارع من ساحه كاتالونيا الشهيره وينتهي الشارع عند الاكواريوم

وما شاء الله الشارع متروس كويتيين وخليجيين 🙂

صورت لكم بعض اللقطات من شارع الرامبلا الشهير في برشلونه

شارع سياحي جميل بس يبيله جو حلو

للاسف احنا رحنا كان الجو حااار الاسبوع اللي طاف والشمس تحرق

بس كان في هوا بارد شوي رقع الطلعه

عدت من اجازتي القصيره انتظروا تقاريري عن السفره :)

14 Oct

صار لي فتره ما كتبت مواضيع في المدونه بسبب سفري خارج الكويت

سافرت الى اسبانيا وفرنسا

انتظروا تقاريري عن شارع الرامبلا في اسبانيا والجوله في ملعب الكامب نو في برشلونه

وبعض الصور عن معالم برشلونه التاريخيه واوتليت لاروكا فيليج في اسبانيا

اما عن فرنسا انتظروا تقارير دزني لاند باريس والعروض اللي حضرناهم اهناك

وصور عن الاوتليت لا فالي فيليج في باريس

وبعض معالم فرنسا مثل برج ايفيل واللوفر وقوس النصر

🙂

%d bloggers like this: