امس تعشيت في مطعم مسيّان للمأكولات الكويتية
في المباركية
المطعم جديد صار له جم شهر فاتح وعندهم قعده داخلية وخارجية
الجو حاليا واااايد حلو والطاولات الخارجية كانت كلها محجوزه
المطعم راقي وديكوراته جميلة
ضيافة المطعم خبز محمش مع قطع طماط بالزيت والزعتر
ونزلوا لنا الاطباق المميزه عندهم بالمطعم
سلطة اللحم التايلندية
هذي سلطتي المفضله بأي مطعم تايلندي لازم اطلبها
وتفاجأت انها موجودة بالمنيو لذلك طلبتها على طول
وكان شكلها وطعمها لذيييذ
حامضه سبايسي
ربيان خليجي بصلصة الميبل
الربيان سويت حالي سبايسي
كان وااايد لذيذ
اجنحة الدجاج بالباربيكيو
سويت زياده عن اللزوم
بطاط مسيّان
البطاط فريش مع جبن سايح وصلصتهم الخاصة
عجيييب انصح فيه للمقبلات
دجاج بالكاري
كانت نكهته مميزه ولذيذ
بس الدجاج كان ناشف شوي
مجبوس اللحم
الهيل والزعفران كان واضح بالعيش النثري مع اللحم الذايب
طبق موفق 🙂
بينك ليمونيد وابل تريت من موكتيلات مسيّان
حلوين جربوهم احلى من الازرق اللي تحت
وختمناها بكوكيز النوتيلا
الاطراف محمشة وبالنص ذايبه كانت حلوة
مدام مطعم كويتي لازم دلة القهوة العربية تكون عالطاوله
مع السمسمية والغريبة والقرص عقيلي والتمر
كان عشا لذيذ وتجربة جديدة حلوة
اطباق كويتية بلمسة معاصرة تغييرعن الطابع الكويتي الشعبي
حجم الاطباق تعتبر صغيره لذلك الطبق الواحد يكفي شخص واحد ماتقدرون تشاركون بالاطباق
والمقبلات بعد كميتها قليله لذلك لازم تطلب اكثر من نوع اذا كنتوا مجموعة
عندهم بعد سندويشات ورابس للي مايبي يتعشى عيوش ومجابيس
وعندهم ريوق
فاتحين من ٨ الصبح لي ١٢ بالليل
مكانهم بالمباركية مقابل مجمع البنوك، المرقاب
22417113/4
وهذا رابط للمنيو الخاص بالمطعم فيه جميع الاطباق بالاسعار
وخريطة موقعهم والانستغرام
كل الشكر عالتجربة الحلوة
Like this:
Like Loading...
Tags: كويتي, كشخة, لحم, مقبلات, مجبوس, مرقة, مسيّان, مسيان, مطعم, اكل كويتي, المباركية, المرقاب, خوش اكل, ربيان, سلطات, شوربة, عيوش
