مستر كي بيكري ارسل لي شيزكيك اللوتس لتجربتها
اللوتس من النكهات اللي حاليا صايره هبة بالكويت وقايم سوقها
الشيزكيك حجمها صغير حلوه حق يمعه صغيره
الجبن كان ترف وكمية اللوتس معقوله لا زياده ولا شويه
والطعم ككل كان لذيييذ
والشيزكيك كانت وااايد خفيفه
هذا حسابهم الانستغرام
وتقدرون تطلبون على رقمهم وعندهم طلبات جاهزة بنفس اليوم
90061143
كل الشكر عالشيزكيك الخفيف
ذا كيك شوب
شغل بيت كويتي متخصصين بالكيك والحلويات
جربت منهم نوعين كيك في يمعتنا
الكيكة شكلها وايد حلو ومرتب
تنفع للمناسبات
وهذا شكلها من الداخل نصها فانيليا ونصها كاكاو
كانت حلوة
وهذي كيكة الرد فيلفيت
واااايد لذيذه وترفه والفروستنغ بطعم الجبن مثل الرد فيلفيت التقليدية
حبيتها وااايد اكثر من الكيكة الثانية
والكل حب الرد فيلفيت اكثر
انصح تطلبونها وتجربونها
اللي يبي يطلب من ذا كيك شوب
عالواتس اب
97404744
شكرا عالكيك الحلو
فرح غاتو شغل بيت متخصصين بالحلويات
جربت من عندهم نوعين من الكيك
اول وحدة شيزكيك المحلبية
Muhalabiya Cheese Cake
طبقة بسكوت وطبقة شيزكيك وطبقة محلبية
لذيييذه حبيناها وايد
باردة وخفيفه ومناسبة لبعد الفطور
والكيكة الثانية كانت كيكة القرع
Pumpkin Cake
شوفوا حسابهم الانستغرام فيه انواع كيك ثانية وشكلهم يشوق
وهذا رقمهم للطلب
98961745
مشكورين فرح غاتو عالنقصة اللذيذة
بالامس زرت السوق الخيري في لجنة ساعد اخاك
وريعة للاجئين السوريين المحتاجين
كان السوق الخيري فيه كل شي
من ازياء وعطور واكسسوارات ومواعين واثاث وحلويات ومطاعم
هذي لقطات من السوق الخيري
جزاهم الله خير المشاركين واللي حضروا
للاسف السوق الخيري كان بس يوم واحد اللي اهو امس
طافة اللي ماحضر 🙂
مريت سابليه في منطقه الشهداء اليوم
ولقيت عندهم شيز كيك بالفراوله الفريش
شكلهم كان يشووووق كل حبه فراوله كانت كبيييره جامبو
وحاطين معاها كرات الجيز كيك عليهم طبقه خفيفه من البسكوت
وتحتهم صلصه فراوله
ماقاومت وشريت منهم درزن لبعد الفطور
وطلع الحلو نااااجح وايد لذيذ والكل استانس عليه
وفي بالصحن حاطين صلصه فراوله للتغميس
كانت لذيييذه مع الجيز كيك
انصحكم تجربونه للي يحب الفراوله
وايد خفيف ولذيذ
الدرزن كان ب ٧ دنانير
من سابليه
طلع سابليه مو هين مطلع شغلات حلوه لرمضان
كاكاو بيكرز يصلح للمولتن كيك
جربته من قبل وطلع عجييييب للمولتن وطريقته وايد سهله ويضبط معاكم من اول محاوله
ويطلع طعمه احلى من المطاعم
كاكاو بيكرز شريته من مركز سلطان صوب قسم الكيك
العلبه الوحده تسوي ٦ – ٨ مولتن كيك
بحط لكم الطريقه خطوه خطوه
المكونات والطريقه تلاقونها خلف علبه الكاكاو
٦ مكعبات كاكاو بيكرز (علبه كامله)ه
٨ ملاعق كبيره زبده
كوب ونص سكر بودر
نص كوب طحين
٣ بيضات كامله
٣ صفار بيض
نذوب الزبده والكاكاو بالمايكرويف
نضيف باقي المكونات ونخلطهم عدل
ونوزع الخلطه في ملال قصدير ومدهونين بزبده
نسخن الفرن على درجه ٢١٨ سيليزيه
وبعد ما يسخن الفرن ندخل المولتن الفرن
وننطر من ١٠ – ١٥ دقيقه
تاااادااااا مولتن كيك شغل بيت
وهذا المولتن مع سكوب ايس كريم فانيليا
اذا تبون يكون كيك اكثر من الصلصه حطوه اكثر بالفرن حوالي ١٥ دقيقه
لكن اذا تحبون الصلصه اكثر من الكيك حطوه ١٠ دقايق بس
شغل ايديه وحيااات عينيه 😍
خوش مولتن تسللللم ايدي
جربوها بالبيت وايد سهله ولذيذه
Cake Pops
كيك بوبس عباره عن كرات كيك حاطينهم باعواد وكل واحد يتفنن بالتزيين
لقيت مكينه عالانترنت تسويهم بالبيت اسمها
Babycakes cake pop maker
طريقه عمل البوب كيك واااايد سهله
بس تحطون الخلطه مالت الكيك وكاتبين طريقتها بكتاب الارشادات اللي ايي معاها
وتنطرون ٤-٥ دقايق بس
شكلهم يشووووق
وممكن تحشونها بالخلطه اللي تبونها كريمه او كاكاو كل وحده وذوقها
هالمكينه سعرها ٨ دنانير بس !! بس لقيتها عالانترنت
وايد حلوه رخيصه وتطلع حلو ب٥ دقايق بس وبالنهايه فنتق حلو واسمه شغل بيت
في احد شايفها بالكويت؟؟ ابي وحده مثلهاااااا
مثل ما عودناكم كل جمعه انقل لكم صور حلو الزواره
وكان هالجمعه من محل بريد توك
كيكه الجزر
Carrot Cake
امدحوها اللي كلوا منها
سعرها ب ٧.٥ دينار
بسبوسه ميني من بريد توك
شكلهم يشوق للتقديم ويمدحون طعمهم
صينيه فيها ٤٠ حبه
ب ٣ دنانير
ايس كريم ميني من فرع جمعيه حطين
حجم البسكوته طول الصبع
العلبه فيها ٤٠ حبه بسكوت ايس كريم ميني
سعرها ١.٤٠٠ دينار
واحنا حطينا فيهم ايس كريم فانيليا لليهال
امس كان يوم ميلاد اخوي الغالي
وحبينا احنا الخوات انسويله مفاجأه
the cake shop طلبنا من محل
customized mini cup cake
انا طرشت لهم ١٠ صور واهم ماقصروا نفذوا طلبي وقلت لهم باقي الكب كيك انتوا سووهم على ذوقكم
رسموا الصور علي الكب كيك مثل ما طلبت منهم
الدرزن الميني كب كيك المرسوم عليه ب ٥ دنانير
وكيكتنا احتاجت ٣ درازن
كلفتنا الكيكه والتوصيل ١٦،٥ دينار
وايد فرح اخوي بالمفاجاه وخاصه ان الرسومات كلها شغلات يحبها وهواياته
كل عام وانت بخير والعمر كله يااارب
شغلهم مرتب وحلو
بس يبيلكم تاكدون عليهم جم مره لان وصلني الطلب مو مثل اللي وصيت عليه ورديته لهم
وضبطوه مره ثانيه ويابوه لي بعد ساعتين
وهذي باقي الصور
الجمعه هذي كان الحلو من الخباز
كيكه الغاناش الكاكاو
غنيه عن التعريف اكيد الكل ذاقها ووقع في غرامها
والشمعه اللي عليها بس جذي حاطينها لليهال كل جم اسبوع يسوون لهم عيد ميلاد
يستانسون يطفونها يعيشون الوضع
مثل ما عودتكم كل جمعه احط لكم حلو اليمعه
هالجمعه كانت اطباق الحلو اكثر لان كان عندنا زوار عزيزين على قلوبنا
فزدنا الجيله 🙂
Rajae By Caramel
كيكه “رجائي” من كراميل هذي الكيكه دماااااار خياليه حق اللي يحب الكاكاو ومو اي كاكاو !! الكاكاو الدسسسم
حدها لذيذه عباره عن كرات كيك كاكاو متروسه بصلصه كاكاو
اول ماتيبونها الكاكاو يكون ذايب بس لما تحطونها بالثلاجه وتردون تطلعونها حطوها بالميكرويف
لذيييييذه وحطوا معاها كره ايس كريم فانيليا عشان تكمل !!!
صدقوني لذيذه لاتطوفكم لعشاق الكاكاو
حجم الطبق وسط ب ١٠ دنانير
Triffle By Caramel
الترايفل من كراميل عباره عن طبقات من بسكوت دايجيستيف وكراميل وطبقه بيضا مادي شنو هذي كريمه او قيمر !!
بس وايد لذيذه واليهال ماتوا عليه
حجم الطبق وسط ب ١٠ دنانير
Mini cup cake by Sweet’n Cup
ؤ
الميني كب كيك من سويت ان كب
كان ٢٤ حبه ب ١٠ دنانير
الحلو كان واااايد وزااااد
اليوم الجمعه يمعتنا ببيت الاهل ولازم كل جمعه احد منهم اييب حلو
اليوم الحلو كان من الخباز فرع جنوب السره
كيكه الفوندو
فيها تغميسه كاكاو لازم نسخنه بالميكرويف ٤٥ ثانيه
ومتروسه فراوله للتغميس
وايد لذيذه وحلوه
بس مشكلتها الفراوله مذويه وقديمه
اللي بيطلبها خل يتأكد من الفراوله ان ماتكون قديمه
كيك.. كيك.. كيك..
السلام عليكم ورحمة الله وبركاته..
أمس أختي طلبت لنا من
The November Bakery
و حبيت أوريكم الأوردر لأن عادة اللي نشوفه بالموقع شي و اللي يوصل البيت شيء آخر تماما..
بس الحمدلله هالمره ضبطت 🙂
طلبت منهم كيكة طبقات مع ورده جوريه أون توب .. مدحوا لها ال
Red Velvet
حجمها صغير تعتبر ميني طبقات .. بس كفت و زادت وبقى منها وايد لأنها دسمه ف تاكلون قطعه صغيره تشبع و طعمها لذيييذ..
بس كانت طالبه لون الورده و الكتابه بالفوشي ويابوه لها وردي فاتح و الورده كانت مذويه شوي ف إذا بتطلبونها ركزوا على هالشغله المفروض تكون الورده فريش..
الله .. آخر صوره حدها يميييي بروح آكل القطعه اللي خشيتها حقي.. 🙂
….
