ميمي كاري
مطعم شبابي كويتي متخصصين بالكاري الياباني
سمعت عنه كلام حلو بالانستغرام ومن تجاربهم قلت لازم امرهم على يوم
مكانهم في مجمع الرحاب
المطعم صغير وفيه شويه طاولات ومتواضع بداعوس بالمجمع
المطعم للامانه ماينفع للعوايل
لان متروس شباب وتدخين
يفضل تطلبون منه سفري او توصيل للي يتضايق من هالاجواء
المطعم الستاف فيه كله كويتيين ونفسيتهم وايد حلوه ويرحبون فيك
والكاشير كويتي وياخذ طلبك بكل دقه ومركز معاك
حبيت معاملتهم الحلوه المرحبه لان لي تجارب سابقه بمطاعم اخرى ستافها كويتي ونفسياااات جنه طار منهم وودهم يطردونك
meme sesame stingers
قطع دياي مقلية وعليهم صلصتهم الخاصة
وااايد لذيذ الدياي ترف وجوسي والصلصات عجيبه
meme monster shehab’s way
هذا الطبق جبااااار انصدمت من لذته وبنفس الوقت فهمت ليش الناس تمدحه
عيش وعليه صدر دياي مقلي جوسي ترررف
وفوقه متروووس جبن وتارسينه كاري
وعليه صلصتين بطريقه شهاب صاحب المطعم والبصل الاخضر
عندهم درجات حراره سبايسي للطبق
اخترت الدرجه المتوسطه وكانت سبايسي لذيذه احس اكثر من جذي يصير سبايسي اوفر
انصح بهالطبق بنفس هالمكونات لان الكاري بروحه حسيته عادي لكن مع الجبن والصلصات عطاااه طعم ثاااني
هذي خيوط جبن ممقطه مو نودلز عبالكم 🙂
شي لذييييذ
Ebi Udon
اودون بالكاري والربيان المقلي
كان حلو بس ميمي مونستر بالدجاج كان وااايد اللللذ
الاودون هذي نودلز يابانيه متينه وايد ولذيذه
الصراحة الاكل جدا جدا لذيذ
الطبق الفايز ميمي مونستر شهاب ستايل
الاسعار شويه غاليه متوسط سعر الطبق ٥ دنانير بس الكميه راهيه وتشبع
النفسيات جدا حلوه ومرحبه هذا شجعني ادخل المطعم وهم خلاني اكون زبونتهم بالمستقبل
انصح البنات والعوايل يطلبون سفري او توصيل لان المكان شبابي ومتواضع
برافو عليكم ميمي كاري شغل مميز ولذيذ واكيد بطلب منكم سفري كلما اشتهي ميمي مونستر
اتمنى تستمرون بهذي الجوده
مكان المطعم في مجمع الرحاب في حولي بالميزانين
وهذا رقمهم للتوصيل
90021389
